გუშინ, 19 ივლისს, ნიუ იორკში ათასობით ადამიანმა რუსეთის ფედერაციის პრეზიდენტის, ვლადიმერ პუტინის წინააღმდეგ აქცია გამართა. აქციაში მონაწილეობას იღებდნენ უკრაინელები, ბელორუსები, ქართველები, ამერიკელები და და სხვადასხვა ეთნოსის წარმომადგენლები. აქცია 17 ივლისს ბოინგ - 777-ის ავიაკატასტროფის შედეგად დაღუპულებს მიეძღვნა. „ტაიმ-სკვერზე“ შეკრებილებს ბანერებზე ეწერათ თითოეული გარდაცვლილის სახელი და გვარი, რომელთა შესახებაც ამ დროისათვის არის ცნობილი.

„ტაიმ-სკვერი შემთხვევით არ აგვირჩევია, ეს ადგილი დღეისათვის ჩვენი მსოფლიოს მოდელია, ირგვლივ თუ მიმოიხედავთ თქვენ იხილავთ ათობით ქვეყნიდან ჩამოსულ ტურისტებს, ეს გლობალიზაციის შედეგია. ერთი ქვეყნის ან რეგიონის პრობლემები აუცილებლად შეეხება მთელ მსოფლიოს, ის რაც უკრაინაში მოხდა, ეს შიდა კონფლიქტი არ არის და უფრო მეტიც, არც რეგიონული კონფლიქტია. ეს მთელი მსოფლიოს პრობლემაა“, განაცხადეს აქციის მონაწილეებმა.

მათივე განმარტებით, ისინი გეგმავენ „თეთრი სახლის“ ვებგვერდზე პეტიციის ინიცირებას ჯონ მაკკეინის ინიციატივის მხარდაჭერასთან დაკავშირებით, დაეხმაროს აშშ უკრაინას, მათ შორის სამხედრო საკითხებშიც.

ანანო კვაჭანტირაძე