უკრაინის პრემიერმინისტრის არსენი იაცენიუკის განცხადებით, უკრაინა მზად არის 17 ივლისს მალაიზიური ბოინგის ჩამოგდების საქმის გამოძიებაში მთავარი საგამოძიებო მოქმედებების ჩატარების უფლება ნიდერლანდებს მისცეს. ამის შესახებ უკრაინული მედია იუწყება.

„უკრაინა მზად არის გადასცეს მთავარი როლი ბოინგის ჩამოგდების საქმის გამოძიებაში ჩვენს დასავლელ პარტნიორებს, ნიდერლანდებს შეუძლია უხელმძღვანელოს აღნიშნულ პროცესს“, - განაცხადა პრემეირმინისტრმა,

მან დააზუსტა, რომ ეს პროცესი წარიმართება უკრაინის სტრუქტურებითა და საერთაშორისო საზოგადოებასთნ მჭიდრო კავშირის შემთხვევაში.

იაცენიუკმა ასევე დასძინა, რომ უკრაინა მზად არის საკუთარ თავზე აიღოს ცხედრების ტრანსპორტირების პროცესი ნიდერლანდების მიმართულებით ყველა აუცილებელი ექსპერტიზის ჩატარების მიზნით.

„რაც შეეხება აუტოფსიისა და სასამართლო-სამედიცინო ექსპერტიზებს გარდაცვლილებთან მიმართებით, ამსტერდამში მსოფლიოს ერთერთი ცნობილი დაწესებულება მდებარეობს და უკრაინის ხელისუფლება მზად არის ცხედრები ამსტერდამში საკუთარი ხარჯებით გადაგზავნოს“, - დასძინა იაცენიუკმა.

ანანო კვაჭანტირაძე