რესპუბლიკელები თვლიან, რომ ბარაკ ობამა „ზედმეტად ფრთხილ“ პოლიტიკას ატარებს რუსეთის ფედერაციის წინააღმდეგ.

სენატრომა სამხრეთ კაროლინიდან ლინდსი გრემმა, ტელეკომპანია „NBC“-ის ეთერში განიხილა უკრაინის ტერიტორიაზე მალაიზიური ბოინგის ჩამოვარდნის შედეგები, ობამას კი „გაუბედაობის მეფე“ უწოდა. მისი თქმით, აშშ-ს პრეზიდენტმა უნდა აღჭურვოს უკრაინის არმია იარაღით.

სენატორი ტენესის შტატიდან ბობ კორკერი Fox News-სთან ინტერვიუში აცხადებს, რომ ობამას ადმინისტრაცია ზედმეტად ფრთხილობს რუსეთთან მიმართებაში ყირიმის რეფერენდუმის შემდეგ. კორკერმა ხაზი გაუსვა იმას, რომ იმედგაცრუებულია არა მხოლოდ ამერიკის, არამედ ევროპის რეაქციითაც უკრაინაში უკანასკნელ პერიოდში მიმდინარე მოვლენებთან დაკავშირებით.

აშშ-ს წარმომადგენლობითი პალატის დაზვერვის კომიტეტის თავმჯდომარემ მაიკ როჯერსმა ABC-ის ეთერში აშშ-ს უკრაინელი სამხედროებისთვის აგრესიული მხარდაჭერის გამოჩენისკენ მოუწოდა. „აშშ-მ უნდა დაივიწყოს მისი დამთმობი პოზიცია“, - განაცხადა როჯერსმა.

რესპუბლიკელმა კონგრესმენმა პიტერ კინგმა CBS-ის ეთერში გადაცემა Face the Nation-ში აშშ-ს ხელისუფლებას შესთავაზა რუსეთს ჩამოართვან უფლება ჩაატაროს 2018 წლის ფეხბურთის მსოფლიო ჩემპიონატი.

კონგრესმენები რუსეთის ფედერაციის წინააღმდეგ სანქციების გამკაცრების პოლიტიკაზეც საუბრობენ.

აშშ და ევროკავშირი არ აღიარებენ ყირიმს რუსეთის ფედერაციის ტერიტორიად და მოსკოვს უკრაინის საშინაო საქმეებში ჩარევასთან დაკავშირებით ბრალს სდებენ. რუსეთი ამ ყოველივეს უარყოფს და მსგავს ბრალდებებს უსაფუძვლოს უწოდებს. დასავლეთის ქვეყნებმა მიმდინარე წლის მარტიდან არაერთხელ აამოქმედეს სხვადასხვა სანქციები რუსეთის ფედერაციის წინააღმდეგ.

აშშ-მ 16 ივლისს რუსეთის ფედერაციის 12 მაღალჩინოსანს ფინანსური და სავიზო სანქციები დაუწესა. ასევე, გაატარა სექტორული ეკონომიკური სანქციები რუსეთის თავდაცვის მიმართულებით. ვაშინგტონსა და ბრიუსელში სანქციების გაფართოებაზეც საუბრობენ.

ანანო კვაჭანტირაძე