ნიდერლანდების საგარეო საქმეთა მინისტრმა ფრანს ტიმერმანსმა მოუწოდა დონბასის ტერორისტებს არ გაეკარნონ ბოინგის გარდაცვლილი მგზავრების ცხედრებს. ამის შესახებ მან უკრაინის პრეზიდენტთან პეტრე პოროშენკოსთან შეხვედრის დროს განაცხადა.

„ჩვენ შეშფოთებული ვართ გავრცელებული ინფორმაციის გამო, რომლის მიხედვითაც გარდაცვლილთა სხეულები შესაძლოა სხვა ადგილზე გადაიტანონ“, - განაცხადა მინისტრმა.

მინისტრის განცხადებით, მისთვის პრიორიტეტს წარმოადგენს, ის, რომ მოახერხოს ცხედრების საკუთარ ქვეყანაში გადასვენება, რათა ოჯახებმა მათი დაკრძალვა შეძლონ.

„როგორც კი მტკიცებულებებს მივიღებთ, ჩვენ არ გავჩერდებით მანამ, სანამ დამნაშავე არ გასამართლდება. საუბარია არა მხოლოდ მათზე, ვინც სასხლეტს გამოჰკრა ხელი, არამედ მათზე ვინც შეუკვეთა. მე ვფიქრობ, რომ საერთაშორისო თანამეგობრობა უნდა გაერთიანდეს“, - განაცხადა მინისტრმა.

ანანო კვაჭანტირაძე