დამოუკიდებელმა ექსპერტმა მაია ნიკოლაიშვილმა საქართველოს მთავარი პროკურატურა სულ ცოტა ხნის წინ დატოვა. როგორც ექსპერტმა განაცხადა, უწყებაში მას ეროსი კიწმარიშვილის გვამის დათვალიერების ოქმი გააცნეს.

ამის შესახებ მაია ნიკოლაიშვილმა ტელეკომპანია „იმედის“ ეთერში გადაცემა „რეაქციაში" ისაუბრა.

„ქალაქის პროკურატურაში მომცეს საშუალება, რომ გავცნობოდი, წამეკითხა და გამეკეთებინა ამონაწერები, ოღონდ ქსეროასლი არა. ამ ოქმიდან ცნობილი ხდება, რომ წინა და უკანა მარცხენა ფანჯრები ღია იყო და ორივე სამზეური ჩამოწეული იყო.

იარაღი იყო მარჯვენა ფეხის სიახლოვეს, ფეხებს შორის დაშორება 20 სანტიმეტრია, ხელი იყო გაშლილ მდგომარეობაში და შხეფები იქ არის, რომელიც მე სასექციოში ვნახე და შემდეგ უკვე შევავსეთ მანქანის დათვალიერებით,მასრა არის უკანბა მხარეს მეორე და მესამე სავარძლებს შორის“,- განაცხადა მაია ნიკოლაიშვილმა და დასძინა, რომ აღნიშნული აბსოლუტურად არ ცვლის დღევანდელ მდგომარეობას.

მისი თქმით, ეს იყო უბრალოდ საზოგადოების ინტერესი, თუ როგორ მდგომარეობაში იჯდა გარდაცვლილი.

ნინა გოლოშვილი