აშშ-ს სახელმწიფო დეპარტამენტმა რუსეთის ფედერაცია ოფიციალურად დაადანაშაულა უკრაინის აღმოსავლეთში სეპარატისტული მოძრაობის გაღვივებასა და უკანონო შეიარაღებული დაჯგუფებების ფინანსურ მხარდაჭერაში.

დოკუმენტში, რომელიც სახელმწიფო დეპარტამენტმა თავის ოფიციალურ საიტზე გამოაქვეყნა, დეტალურად არის წარმოდგენილი რუსეთის ფედერაციის მამხილებელი ფაქტები, დონეცკსა და ლუგანსკში ბოევიკების მხარდაჭერის შესახებ.

,,რუსეთი მუდმივად აცხადებს მის სურვილზე მიღწეულ იქნას მშვიდობა, მაგრამ ქმედებებით ის საპირისპიროს აკეთებს. შეერთებული შტატები არ ფლობს არცერთ მტკიცებულებას იმისა, რომ რუსეთმა შეწყვიტა სეპარატიზმის მხარდაჭერა. პირიქით, სახელმწიფო დეპარტამენტის მონაცემებით, რუსეთი აგრძელებს მათ მხარდაჭერას შეიარაღებით, მათ შორის მძიმე ტექნიკით. უკანონო შეიარაღებული ფორმირებები კარგად არიან უზრუნველყოფილი ფინანსურად, თავისუფლად გადაადგილდებიან რუსეთის საზღვარზე და აღმოსავლეთ უკრაინასთან მოსაზღვრე ზონაში რუსეთის ფედერაცია აგრძელებს თავისი შეიარაღებული ძალების კონცენტრაციას,"- ნათქვამია აშშ-ს სახელმწიფო დეპარტამენტის მიერ გამოქვეყნებულ დოკუმენტში.

სახელმწიფო დეპარტამენტში ცალსახად აღიარებენ სეპარატისტული მოძრაობების ხელმძღვანელობაში რუსეთის ფედერაციის მოქალაქეების დომინირებასა და მათ უშუალო დაქვემდებარებას კრემლისადმი.