თეა წულუკიანმა იმიტირებულ სასამართლო პროცესში მონაწილე სტუდენტები დააჯილდოვა

სამართალი - 17:45, 07 Jul, 2014

1828

იუსტიციის მინისტრმა თეა წულუკიანმა და მისმა მოადგილე ალექსანდრე ტაბატაძემ საერთაშორისო ჰუმანიტარული სამართლის კონკურსსა და იმიტირებულ სასამართლო პროცესებში გამარჯვებული სტუდენტები დააჯილდოვეს.

თეა წულუკიანმა იმ სამართლებრივ შეჯიბრებაზე ისაუბრა, რომელიც იუსტიციის სამინისტრომ იუსტიციის სასწავლო ცენტრსა და პარტნიორ ორგანიზაციებთან ერთად ჩაატარა, და ტრეფიკინგის წინააღმდეგ ბრძოლის მნიშვნელობას გაუსვა ხაზი.

„ჩვენ დავდექით იმ გზაზე, როდესაც პროაქტიულად ვეძიებთ ამ დანაშაულის კერებს და ხდება სამართლებრივი დევნა პროაქტიულად. გაზრდილია სტატისტიკური მაჩვენებლებიც. ამგვარი წინსვლა ნაწილობრივ არის კავშირში მართლზომიერების ამაღლებასთან საზოგადოებაში და განათლების სფეროში. ჩვენს ახალგაზრდა თაობას სჭირდება მეტად გაცნობიერება იმისა, რაოდენ საშიში დანაშაულია ტრეფიკინგი“, − განაცხადა იუსტიციის მინისტრმა.

იმიტირებული სასამართლო პროცესები ადამიანით ვაჭრობის (ტრეფიკინგის) წინააღმდეგ ბრძოლის ერთიანი საინფორმაციო კამპანიისა და საერთაშორისო ჰუმანიტარული სამართლის იმპლემენტაციის უწყებათაშორისი კომისიის მანდატის ფარგლებში განხორციელდა. მას ორგანიზება საქართველოს იუსტიციის სამინისტრომ გაუწია ევროკავშირის დელეგაციასთან, საქარველოში წითელი ჯვრის საერთაშორისო კომიტეტის წარმომადგენლობასთან, სსიპ „იუსტიციის სასწავლო ცენტრთან“, სსიპ „ადამიანით ვაჭრობის (ტრეფიკინგის) მსხვერპლთა, დაზარალებულთა დაცვისა და დახმარების სახელმწიფო ფონდთან“, საქართველოს სახალხო დამცველის აპარატთან, ა(ა)იპ „საქართველოს ახალგაზრდა იურისტთა ასოციაციასა“ და „სამოქალაქო განვითარების სააგენტოსთან“ მჭიდრო თანამშრომლობით. იმიტირებულ პროცესებში მონაწილეობა მიიღო საქართველოს 10-მდე სხვადასხვა უნივერსიტეტმა. 1 ივნისს გამართულ ფინალში ერთმანეთს კავკასიის სამართლის სკოლისა და თბილისის თავისუფალი უნივერსიტეტის გუნდები დაუპირისპირდნენ. გამარჯვება თბილისის თავისუფალი უნივერსიტეტის გუნდმა მოიპოვა, საუკეთესო მომხსენებლებად კი დასახელდნენ ოლეგ თორთლაძე (კავკასიის სამართლის სკოლა), ანა ჭაია (თბილისის თავისუფალი უნივერსიტეტი) და ნათია ჯანელიძე (აკაკი წერეთლის სახელმწიფო უნივერსიტეტი).

გამარჯვებული გუნდის წევრები სტაჟირებას გაივლიან საქართველოს სახალხო დამცველის აპარატსა და სსიპ „ადამიანით ვაჭრობის (ტრეფიკინგის) მსხვერპლთა, დაზარალებულთა დაცვისა და დახმარების სახელმწიფო ფონდში“.

საერთაშორისო ჰუმანიტარული სამართლის ეროვნული შეჯიბრის ფინალური ტური 2014 წლის 16-18 მაისს იუსტიციის სასწავლო ცენტრის ყვარლის ფილიალში ჩატარდა. თბილისის სახელმწიფო უნივერსიტეტისა და თბილისის თავისუფალი უნივერსიტეტის გუნდების დაპირისპირება თსუ-ს გამარჯვებით დასრულდა. საუკეთესო მომხსენებელად ონისიმე ცხომელიძე დასახელდა.