მალე აჭარის ტელევიზიის რეორგანიზაცია იგეგმება

საზოგადოება - 17:25, 18 Dec, 2012

705

საკანონმდებლო ინიციატივის ავტორის, პარლამენტარ მურმან დუმბაძის განცხადებით, "აჭარის ავტონომიურ რესპუბლიკას შეეძლება, საქართველოს კანონმდებლობის შესაბამისად, ავტონომიური რესპუბლიკის კანონით შექმნას აჭარის საზოგადოებრივი მაუწყებელი".

,,საქართველოს მთავრობას არაუგვიანეს 2011 წლის 1 ნოემბრისა უნდა მოემზადებინა წინადადებები აჭარის ავტონომიური რესპუბლიკის სახელმწიფო ტელევიზიის რეორგანიზაციის თაობაზე, რაც დღემდე არ გაკეთებულა. საქართველოს კანონმდებლობა დაუშვებლად მიიჩნევს, რომ ადმინისტრაციული ორგანო მაუწყებლის მესაკუთრე იყოს და აქედან გამომდინარე, აჭარის ავტონომიური რესპუბლიკის სახელმწიფო ტელევიზიის დღევანდელი სტატუსი მოქმედ კანონმდებლობას არ შეესაბამება. აღნიშნულ კანონში ცვლილებების შეტანის შედეგად, აჭარის სახელმწიფო ტელევიზიის სტატუსი საქართველოს კანონმდებლობასთან შესაბამისობაში მოვა", - განაცხადა მურმან დუმბაძემ.

განათლების, მეცნიერებისა და კულტურის კომიტეტმა მხარი დაუჭირა კანონპროექტის პლენარულ სხდომაზე გატანას გარკვეული შენიშვნების გათვალისწინებით. კერძოდ, კომიტეტის თავმჯდომარის მოადგილის ელისო ჩაფიძის განცხადებით, “სამეურვეო საბჭოში 5 წევრის ნაცვლად, 7 უნდა იყოს და მათი არჩევა უნდა მოხდეს არა ერთი, არამედ 2 ან 3 წლით".

მისივე თქმით, "აჭარის ავტონომიური რესპუბლიკის უმაღლესმა საბჭომ ავტონომიური რესპუბლიკის მთავრობას ტელევიზიის სამეურვეო საბჭოში მეურვის დანიშვნის თობაზე თანხმობა უნდა მისცეს არა ფარული კენჭისყრით, არამედ ღია კენჭისყრით”.