რასმუსენი: ახლა დროა შემცირებების შეწყვეტა და თავდაცვის ხარჯების ზრდის დაწყება

მსოფლიო - 19:24, 06 Jul, 2014

2180

რუსეთის შეიარაღებული ძალების შესაძლებლობები შეაფასა ,,ევრონიუსთან“ ინტერვიუში ნატოს გენერალურმა მდივანმა. რასმუსენი აღნიშნავს, რო უკრაინის შემთხვევაში რუსეთს გაცილებით თანამედროვე შეიარაღება ჰყავს, ვიდრე ეს იყო 2008 წელს. მისივე თქმით, ნატო დარწმუნდა, რომ რუსეთს სწრაფი რეაგირება შეუძლია, ამიტომ, მისი თმიქთ, მოკავშირეებმა უნდა გაზარდონ თავდაცვითი ხარჯები.

"ჩვენ დავინახეთ გაცილებით თანამედროვე შეიარაღებული ძალები იმასთან შედარებით, რაც იყო 2008 წელს, როდესაც რუსეთი თავს დაესხა საქართველოს. ამ მიზეზით, მოვუწოდებ ნატო-ს მოკავშირეებს, გაზარდონ თავდაცვის ხარჯები და დააჩქარონ ჩვენი შეიარაღებული ძალების მოდერნიზაცია. ბოლო 5 წლის განმავლობაში რუსეთმა 50 %-ით გაზარდა თავდაცვის ბიუჯეტი, მაშინ, როდესაც ნატო-ს წევრმა ქვეყნებმა თავდაცვის ხარჯები 20 %-ით შეამცირეს. რაც უკრაინაში ვნახეთ, გარდამტეხ მომენტად იქცა. ახლა დროა შემცირებების შეწყვეტა და თავდაცვის ხარჯების ზრდის დაწყება", – აღნიშნა გენერალურმა მდივანმა.

რასმუსენმა თავის 5-წლიან მოღვაწეობაზე ისაუბრა და აღნიშნა, რომ დღეს ნატო გაცილებით ძლიერია.

"დღეისათვის ნატო უფრო ძლიერი, ოპერატიული და უკეთესად მომზადებულია. მიუხედავად თავდაცვის ბიუჯეტების შემცირებისა, ვხედავთ, რომ ალიანსი გაცილებით ძლიერია. ავღანეთში, კოსოვოსა და სხვა ოპერაციების წყალობით, ჩვენი შეიარაღებული ძალები მიეჩვივნენ ერთად მოქმედებასა და მუშაობას, უკეთესად არიან საბრძოლველად მზად. ახალ შესაძლებლობებში ჩავდეთ ინვესტიციები. გადავწყვიტეთ კიბერდაცვის გაძლიერება. ასე რომ, მთლიანობაში, მე ვიტყოდი, დავწვით ცხიმები და გავიძლიერეთ კუნთები. ასე რომ, დღეს გაცილებით ძლიერ ნატო-ს ხედავთ", - განაცხადა რასმუსენმა.