გიგი უგულავას უსაფრთხოების მიზნით, მასზე ვიდეო-თვალთვალი მიმდინარეობს

სამართალი - 15:23, 06 Jul, 2014

3154

მატროსოვის ციხეში იმყოფებოდნენ სახალხო დამცველის წარმომადგენლები, მათი ინფორმაციით გიგი უგულავა ამჟამად არის ნორმალურ პირობებში. მის საკანზე მიმდინარეობს ვიდეო ჩაწერა მისივე თანხმობით და უგულავას უსაფრთხოების მიზნით. სახალხო დამცველის წარმომადგენლების ინფორმაციით, გლდანის მე-8 დაწესებულებაში ინციდენტი მას შემდეგ მოხდა, როცა უგულავა ციხის ადმინისტრაციას გადაჰყავდა დაწესებულების იმ ნაწილში, სადაც სასჯელს იხდიან ყოფილი პოლიციელები, უგულავას იქ გამოჩენას მოჰყვა ხმაური და შეურაცხმყოფელი გამონათქვამები, ამის შემდეგ ის დააბრუნეს. გიგი უგულავა არ ღებულობდა საკვებს და ითხოვდა მატროსოვის ციხეში გადაყვანას. თბილისის ყოფილი მერი დღეს გამთენიისას გადაიყვანეს მატროსოვის ციხეში.

,,გიგი უგულავა მოვინახულეთ გუშინ ღამე. ის იყო მოთავსებული სასჯელაღსრულების საკარანტინო ნაწილში, განმარტოების საკანში. მასთან საუბრისას გაირკვა, რომ დღის განმავლობაში სცადეს მისი გადაყვანა იმ კორპუსში, სადაც მოთავსებული არიან ყოფილი პოლიციელები, თუმცა გადაყვანას მოჰყვა ხმაური, რის შემდეგაც ის დააბრუნეს საკარანტინო ნაწილში. ჩვენს მიერ ადმინისტრაციისადმი მიცემული რეკომენდაციების შემდეგ, იყო გადაწყვეტილება მიღებული, რომ გიგი უგუალავა გადაეყვანათ მე-9 დაწესებულებაში ე.წ. მატროსოვის ციხეში. ამას მოითხოვდა უგულავა და ამ მიზეზით საკვებს არ იღებდა. ამჟამად ის თავს კარგად გრძნობს. მასზე მიმდინარეობს ვიდეო თვალთვალი და ეს გიგი უგულავას თანხმობით განხორციელდა, შედგა ოქმი, რაზედაც მან ხელი მოაწერა. თუმცა ჩენთან საუბრისას განაცხადა, რომ თუ სხვა საშუალებით იქნებოდა მიღებული მისი უსაფრთხოების დაცვა, ისურვებდა სხვა მეთოდებს“ - განაცხადა სახალხო დამცველის აპარატის მონიტორინგისა და პრევენციის დეპარტამენტის ხელმძღვანელმა ნიკა კვარაცხელიამ.