გიგი უგულავა: "ჩვენ არ გადავყვებით ივანიშვილის შიზოფრენიას"

სამართალი - 21:31, 04 Jul, 2014

3611

თბილისის საქალაქო სასამართლოში თბილისის ყოფილი მერის გიგი უგულავას სასამართლო პროცესი 3 საათზე მეტია რაც მიმდინარეობს. პროცესზე, რომელზეც უგულავასთვის აღკვეთი ღონისძიების შეფარდებაზე მიდის მსჯელობა, სასამართლოს სიტყვით გიგი უგულავამ მიმართა.

”ის რაც გამიკეთებია, გამიკეთებია ჩემი ქალაქისთვის და ჩემი ხალხისთვის და ამას არავის არ ვამადლი. როგორ შეიძლება 5 შვილის მამა ვიყო კრიმინალი, ჩემი მომაკვდავი სიმამრი და ქვისლი და საერთოდ, ყველა ჩემი მეგობარი იყოს კრიმინალი. ეს არის ბიძინა ივანიშვილის დაკვეთა, რაზეც მოწმობს ეს ფართხა-ფურთხით შეთითხნილი საქმეები. მე, გიგი უგულავა, არსად გაქცევას არ ვაპირებდი და არც ვაპირებ, ვაპირებ დავრჩე და ვიბრძოლო, თუნდაც ციხიდან. ჩემთვის პრინციპული იყო გავსულიყავი და დავბრუნებულიყავი ქვეყნიდან, სწორედ ამით მინდოდა დამემტკიცებინა, რომ არსად გაქცევას არ ვაპირებდი. მით უმეტეს, დაკითხვაზე მოწმის სტატუსით ვიყავი დაბარებული და ქვეყნიდან დროებით გასვლის უფლება არ მეკრძალებოდა. ამათ კი გაავრცელეს ინფორმაცია, თითქოსდა სოც. ქსელებში ბილეთების სურათებით ვმანიპულირებდი და გაქცვას ვაპირებდი. მაგრამ მე ამ ბედნიერებას ივანიშვილს და ღარიბაშვილს არ მივანიჭებ. ციხე არ არის ადგილი, რომელიც ადამიანს ბრძოლაზე ხელს ააღებინებს. ეს არის ერთი კაცის სურვილი, ვინც ცდილობს გაანადგუროს წინა ხელისუფლების ყველა ლიდერი. ჩემი დაკავება თვითმმართველობის არჩევნების მეორე ტურს უკავშირდება, ხელისუფლებას სწორედ ამის შიში აქვს. მინდა ვთქვა, რაც არ კლავს, აძლიერებს და ჩვენ არ გადავყვებით ივნიშვილის შიზოფრენიას. რაც შეეხება “რიჟა” კაპანაძეს, ის გავიცანი როგორც ჩემი ქვისლის, გიორგი ღონიაშვილის მეგობარი, თუმცა, სამწუხაროდ, მას მეგობრების შერჩევა არ სცოდნია, კაპააძე ძალიან ცბიერი ადამიანია”,- განაცხადა სიტყვით გამოსვლისას გიგი უგულავამ.