საბაჟო გამშვები პუნქტის „სარფის“ ტერიტორიაზე შემოსავლების სამსახურის თანამშრომლებმა სისხლის სამართლის დანაშაულის შემცველი ორი ფაქტი გამოავლინეს

კერძოდ, მებაჟე ოფიცრებმა თურქეთიდან შემოსული თურქეთის მოქალაქის გ.ზ.-ის ბარგისა და ხელბარგის დათვალიერებისას აღმოაჩინეს დიდი რაოდენობით ნარკოტიკული ნივთიერების შემცველი მედიკამენტები: SUBOXONE (buprenorphine) 8 mg. - 37 აბი, SUBOXONE (buprenorphine) 2 mg. - 7აბი და LOMOTIL (diphenoxylate) 2,5 mg. - 20 აბი. აღნიშნული საქმე შემდგომი რეაგირებისთვის გადაეცა საქართველოს შსს საპატრულო პოლიციის დეპარტამენტის აჭარის მთავარი სამმართველოს საგამოძიებო განყოფილებას.

იმავე დღეს „სარფის“ კონტროლის ზონაში სატვირთო ავტომანქანით შემოვიდა ასევე თურქეთის რესპუბლიკის მოქალაქე ე. ა., რომელსაც ავტომანქანაში აღმოაჩნდა არადეკლარირებული საქონელი, კერძოდ, 39 კომპლექტი კონდიციონერი, რომლის საბაჟო ღირებულებამ ექსპერტიზის დასკვნის მიხედვით შეადგინა 84416 ლარი.

საქმე შემდგომი რეაგირებისთვის გადაეცა საქართველოს ფინანსთა სამინისტროს საგამოძიებო დეპარტამენტის აჭარისა და გურიის მთავარ სამმართველოს.