პოლკოვნიკ სერგო თეთრაძის ოჯახი და ადვოკატი ბაჩო ახალაიასთვის წაყენებულ ახალ ბრალდებას ეხმიანებიან. მათ თქმით, თუ პროკურატურა საქმეს კარგად არ გამოიძებს, სტრასბურგში იჩივლებენ.

„ბაჩო ახალიას დაკავების მოლოდინი მქონდა, რადგან მრავლად არიან მოწმეები, რომელთა ჩვენებებიც ბაჩო ახალაიას და მეგის ქარდავას ბრალეულობას ადასტურებს. ახალაია ნამდვილად დამნაშავეა, რადგან ის თეთრაძის წამებაში მონაწილეობას იღებდა და ვიმედოვნებთ, რომ ამჯერად მაინც ჩატარდება ობიექტური გამოძიება და შერჩევითი სამართალი მოისპობა“ – განაცხადა ადვოკატმა მაგდა კოტრიკაძემ.

სერგო თეთრაძის მეუღლე ნანა თეთრაძე იმედოვნებს, რომ ახალაიას დაკავება არ იქნება წინაასაარჩევნო პიარი.

„ჩემი მეუღლე უკვე 2 წელზე მეტია, აღარაა ცოცხალი და ახლა რატომ დაინტერესდა პროკურატურა ახალაიას დაკავებით? დიდი იმედი მაქვს, რომ ახალაია შესაბამისად დაისჯება, რადგან წინააღმდეგ შემთხვევაში სტრასბურგში ვიჩივლებ. რაც შეეხება მეგის ქარდავას, გიორგაშვილის, ჩაპლაგინის და ლონდარიძის ეპიზოდებში მას ბრალი დასდეს და გაუგებარია, ჩემი ქმრის ეპიზოდში როგორ გასამართლდა. ჩვენების მიცემის წინა დღეს მან წერილი გამომიგზავნა, სადაც ამბობდა, რომ ეს პიარის ნაწილია და დამნაშავე არაა, მაგრამ დარწმუნებული ვარ, რომ ქარდავაც და ახალაიაც დამნაშავეები არიან და ვიმედოვნებ, რომ ისინი კანონის სრული სიმკაცრით დაისჯებიან“ – აღნიშნა ნანა თეთრაძემ.