„თავისთავად, თუკი არსებობს დასაბუთებული ან ალბათობის მაღალი ხარისხით იმის საფუძველი, რომ ბრალდებული მიიმალება, რა თქმა უნდა, ეს არის ის სტანდარტი, რომლის პირობებშიც სასამართლო გამოძიების შუამდგომლობას აკმაყოფილებს და იყენებს პატიმრობას, მაგრამ ეს ყველაფერი უნდა იყოს დადასტურებადი. თუკი გადავხედავთ უგულავას შემთხვევაში ისტორიას, რამდენადაც მე ვიცი, უგულავას რამდენიმეჯერ დატოვებული ჰქონდა საქართველოს ტერიტორია და დაბრუნებულიც იყო. ეს გარემოება ერთ კითხვის ნიშანს აჩენს ვარაუდისთვის, იმასთან დაკავშირებით, აპირებდა თუ არა მიმალვას უგულავა“, - განაცხადა ექსპერტმა.

ექსპერტმა აღნიშნა, რომ გიგი უგულავას დაკავებას გარდა სამართლებრივისა, პოლიტიკური შემადგენელიც აქვს:

„გარდა ამისა, ამავე საქმეზე გუშინ უკვე ნამსჯელი ჰქონდა სასამართლოს. ერთი და იმავე საკითხზე გარემოება არსებითად უნდა იყოს შეცვლილი, რომელიც სასამართლოს მისცემს საფუძველს ვარაუდისთვის, რომ მართლაც შეიცვალა ეს ყველაფერი და გამოიყენოს პატიმრობა. ამ ყველაფერს გარდა სამართლებრივისა, აქვს პოლიტიკური შემადგენელიც, იგივე ევროასოცირების შემდგომ, არანაკლები მნიშვნელობის გამოწვევა გველის წინ, მხედველობაში მაქვს უელსის სამიტი, ნატოსთან ურთიერთობის საკითხი და მე ვფიქრობ, გამოძიება კიდევ უფრო ფრთხილი რომ ყოფილიყო, კარგი იქნებოდა სახელმწიფოებრივი თვალსაზრისით, იმიტომ, რომ რეალურად ეს გააჩენს დამატებით კითხვებს, თუკი სასამართლოს მსჯელობის საგანი სამომავლოდ კიდევ გახდება ეს თემა“, - აღნიშნა ალაფიშვილმა.

ალაფიშვილი მიიჩნევს, რომ გიგი უგულავას დაკავებისას ოპტიმალური გადაწყვეტილებები უნდა ყოფილიყო მიღებული, ხოლო გამოძიებას პროცედურები გაცილებით მეტი მტკიცებულებების მოპოვების შემდეგ უნდა წარემართა.

„გუშინდელ პროცესზე ბრალდების მხარე ითხოვდა არა პატიმრობის გამოყენებას, არამედ გირავნობას, ეს დამატებით კითხვებს გააჩენს არა მხოლოდ ქვეყნის შიგნით, არამედ ჩვენს მეგობრებში საზღვარგარეთაც და იქნება ძალიან რთულად პასუხგასაცემი. მე ვფიქრობ, სახელმწიფოს გონიერება სწორედ იმაში მდგომარეობს, რომ ამ გამოწვევებზე ოპტიმალური გადაწყვეტილებები მიეღო, გამოძიებას მეტი მტკიცებულება შეეგროვებინა და ისე წარემართა პროცესები“, - განმარტა „ნიუპოსტთან“ საუბრისას ლევან ალაფიშვილმა.

შეგახსენებთ, რომ გიგი უგულავა ფინანსური პოლიციის საგამოძიებო სამსახურის თანამშრომლებმა თბილისის საერთაშორისო აეროპორტში გამთენიისას დააკავეს. უგულავა კიევში გიგა ბოკერიასთან ერთად მიემგზავრებოდა. თბილისის ყოფილი მერი ამ დრომდე ე.წ. მოდულის შენობაში იმყოფება. დედაქალაქის ყოფილ მერს ფინანსურ მაქინაციებში ედავებიან.