თბილისის უფლებამოსილებაშეჩერებული მერის გიგი უგულავას უფლებადამცველი გიორგი გელხაური მისი დაცვისქვეშმყოფის დაკავების შესახებ კომენტარს აკეთებს.

გელხაურის განმარტებით, უგულავას დაპატიმრების უფლება ფინანსურ პოლიციას არ ჰქონდა, რადგან უგულავამ გუშინდელ სასამართლო პროცესზე ქვეყნის დატოვების შესახებ განმარტება გააკეთა:

„განმარტება ერთადერთი იყო ის, რომ ის დააკავეს უკანონო შემოსავლების ლეგალიზაციასთან დაკავშირებით მიმდინარე გამოძიებაზე, ეს არის სრულიად უკანონო, არავითარი საფუძველი არ არსებობს, რომ გიორგი უგულავა დაეკავებინათ ამ ეტაპზე. არ შეიძლებოდა დღევანდელი მისი გამგზავრება აღქმულიყო, როგორც გაქცევა, იმიტომ, რომ მან გუშინდელ სასამართლო პროცესზე განაცხადა და ცალსახად დააფიქსირა, რომ ის წავიდოდა და უკან დაბრუნდებოდა, ფაქტობრივად მე არ მომეცა იმის საშუალება, რომ დაკავების ოქმზე დამეწერა შენიშვნა და მომეწერა ხელი“, - განაცხადა გიორგი გელხაურმა.

შეგახსენებთ, რომ გიგი უგულავა გამთენიისას თბილისის საერთაშორისო აეროპორტში ფინანსურმა პოლიციამ დააკავა. მას ხელბორკილები აეროპორტშივე დაადეს და ჯერჯერობით უცნობია თუ სად გადაიყვანეს. უგულავა კიევში გამგზავრებას გეგმავდა, თუმცა, სამართალდამცავებმა მას ქვეყნის დატოვების უფლება არ მისცეს.