უწყებათაშორისი კომისიის თავჯდომარის თეა წულუკიანის თქმით, არჩევნების მეორე ტურამდე გიგი უგულავას დაკითხვაზე განმეორებით დაბარება არ იგეგმება.

მისივე ინფორმაციით, სასამართლო უგულავასთვის მხოლოდ აღმკვეთი ღონისძიების შეფარდების საკითხს განიხილავს.

„პრემიერის მიერ გამოცხადებული მორატორიუმი კეთილი ნების ჟესტი – პოლიტიკური ნებაა. კანონში მორატორიუმის შესახებ არაფერი წერია. აქედან გამომდინარე, იმის გამო, რომ ბატონმა უგულავამ ოჯახის წევრთან ერთად თვითმფრინავის ბილეთი შეიძინა და სადღაც მიემგზავრებოდა, დაიბარეს დაკითხვაზე და გაარკვიეს, სად მიემგზავრებოდა და ხომ არ აპირებდა მიმალვას, ამაში მორატორიუმის დარღვევას ნამდვილად ვერ ვხედავ", - განუცხადა ჟურნალისტებს წულუკიანმა.

მისი თქმით, მორატორიუმმა დადებითი როლი ითამაშა იმ ადამიანებისთვის, ვინც არჩევნებში მონაწილე კანდიდატები იყვნენ, მათ შორის "ნაციონალური მოძრაობიდან".

„ყველა წინა შემთხვევაში უგულავა საგამოძიებო ორგანოს ატყობინებდა, რომ ქვეყნიდან გასვლას აპირებდა და შემდეგ უკან ბრუნდებოდა. ამჯერად მას ჰქონდა განზრახვა, ქვეყანა საგამოძიებო ორგანოს გვერდის ავლით დაეტოვებინა", - აღნიშნა თეა წულუკიანმა.