მისი განცხადებით, 2012 წლის ბიუჯეტი ბოლოა, სადაც სხვა ხარჯები, რომელიც მილიარდ ლარს აჭარბებდა, გაშიფრული არ იქნება.თუ აქამდე ბიუჯეტი ხალხზე მორგებული არ იყო, ონოფრიშვილი პირობას დებს, რომ ის ამჯერად მაქსიმალურად გაითვალისწინებს ხალხის ინტერესებს.

ამის შესახებ ონოფრიშვილმა პარლამენტის პლენარულ სესიაზე სიტყვით გამოსვლისას განაცხადა.

,,მე მსურს და დარწმუნებული ვარ, რომ მომავალი წლიდან სახელმწიფო ბიუჯეტი რადიკალურად იქნება განსხვავებული და უკვე განსხავავებულია იმ ბიუჯეტისებისგან, როგორიც ბოლო წლების ბიუჯეტები იყო. რას ეხება ეს საკითხი? – პირველ რიგში იმას, რომ 2012 წლის ბიუჯეტი ბოლო იქნება იმ რიგი ბიუჯეტებიდან, რომლებსაც ბოლო წლებში ჩვენ ვხედავდით და უკანასკნელი, როცა სხვა ხარჯები, რომელიც მილიარდ ლარს აჭარბებდა, პარლამენტში გაშიფრული არ იყო. არავინ არ იცოდა, გარდა ვიწრო წრისა – ფინანსთა და რამდენიმე სხვა მინისტრისა, თუ სად იქნებოდა ეს ხარჯები გახარჯული. თავისთავად ეს არც მოსახლეობამ იცოდა და არ იცოდნენ პარლამენტის წევრებმაც კი. ამიტომ ამმხრივ, 2012 წლის ბიუჯეტი იქნება ბოლო, რომელიც წარსულს ჩაბარდება და ჩვენ ვიცით, რომ 2013 წლის ბიუჯეტის პროექტში ფინანსთა სამინისტროს სხვა ხარჯები უკვე გაწერილი აქვს და იქ ნაჩვენებია, თუ სად მიემართება ეს თანხები. მინდა, დავაზუსტო, რომ სხვა ხარჯების არსებობა გარკვეული კლასიფიკატორით არის აუცილებელი, მაგრამ სამწუხაროდ, წინა ხელისუფლებას არ გააჩნდა პოლიტიკური ნება, გაეშიფრა ის", - განაცხადა ონოფრიშვილმა.