უკრაინის პრეზიდენტმა აღმოსავლეთ უკრაინააში ვითარების დარეგულირების გეგმა შეიმუშავა

მსოფლიო - 12:15, 22 Jun, 2014

1569

პეტრო პოროშენკომ უკრაინის აღმოსავლეთით არსებული ვითარების მშვიდობიანი გზით დარეგულირების 15 პუნქტიანი გეგმა მიიღო. გეგმა ყველა მხარის უსაფრთხოების გარანტიებს ითვალისწინებს.

გეგმა მძევლების გათავისუფლებას ითვალისწინებს და იმ პირებს სისხლის სამართლებრივი პასუხისმგებლობისგან ათავისუფლებს, ვინც იარაღი საკუთარი ნებით ჩააბარა და განსაკუთრებით მძიმე დანაშაული არ ჩაუდენია.

პრეზიდენტის მიერ მიღებული დოკუმენტის მიხედვით, შეიქმნება ყველა აუცილებელი პირობა იმისათვის, რომ რუსმა და უკრაინელმა დაქირავებულებმა გარანტირებული კორიდორით ქვეყნის ტერიტორია დატოვონ.

იგეგმება აგრეთვე ვადამდელი საპარლამენტო და ადგილობრივი თვითმმართველობის არჩევნების ჩატარება.

გეგმის პირველი ეტაპი ანტიტერორისტული ოპერაციის ფარგლებში, ძალის გამოყენების შეწყვეტას ითვალისწინებს, თუმცა როგორც პოროშენკომ განაცხადა, თუ ცეცხლის შეწყვეტის შეთანხმება დაირღვევა, უკრაინის არმია შესაბამის ღონისძიებებს განახორციელებს.

პეტრო პოროშენკო მიიჩნევს, რომ ამ გეგმის წარმატებით რეალიზაცია აღმოსავლეთ უკრაინაში მშვიდობის დამყარებას შეუწყობს ხელს.