აშშ-ის პრეზიდენტის ბარაქ ობამას რეიტინგი ქვეყანაში 41%-მდე დაეცა.

ამერიკული გამოცემა Wall Street Journal-ისა და ტელეკომპანა NBC-ის დაკვეთით ჩატარებული კვლევის მიხედვით, ობამას საგარეო პოლიტიკას გამოკითხულ ამერიკელთა მხოლოდ 37% ემხრობა, რაც ყველაზე დაბალი მაჩვენებელია მისი პრეზიდენტობის განმავლობაში. რესპონდენტთა 57% მხარს არ უჭერს აშშ-ის პრეზიდენტის საგარეო პოლიტიკას.

„ამ მაჩვენებელზე უარყოფითად აისახა ობამას მიერ გუანტანამოს ციხიდან „თალიბანის" რამდენიმე წევრის გათავისუფლება, რომლებიც აშშ-ის არმიის სერჟანტ ბოი ბერგდალში გადაცვალეს", - განმარტავენ გამოკითხვის ავტორები.

ამერიკელთა უმრავლესობა მიიჩნევს, რომ ობამას აღარ შესწევს არსებული ამოცანების შესრულება - რესპონდენტთა 54% -მა პრეზიდენტის შესაძლებლობებისადმი ნდობა დაკარგა; 42% კი, საწინააღმდეგო აზრზე დგას.