აღმოსავლეთ საქართველოში თოვა გრძელდება. ნალექი იქნება თბილისშიც. ღამით კი ყინვაა მოსალოდნელი.თბილისში მთელი ღამის განმავლობაში მოსულმა ნალექმა გზებზე მცირე პრობლემა შექმნა. საქალაქო სამსახურები 24-საათიანი მუშაობის რეჟიმში არიან გადასულები. გზებზე იყრება მარილი.


თოვლის გამო სამაშველო ჯგუფების დახმარება 10-მდე ავტომანქანას დასჭირდა.


ამ დროისთვის შეფერხებებია ტყიბული-ამბროლაურის გზის მონაკევთზე, სადაც მოძრაობა მხოლოდ მოცურების საწინააღმდეგო ჯაჭვითაა დასაშვები. იგივე მდგომარეობაა გუდაური-კობის გზის მონაკვეთზეც. 

თოვლის გამო მოძრაობა გომბორსა და ნატახტარზეც არის შეფერხებული. რიკოთზე კი მოძრაობა თავისუფალია და ავტომობილები შეუფერხებლად გადაადგილდებიან.

მაშველებმა ოქროყანასა და ცხვარიჭამიაში თოვლიდან 5 ავტომობილი ამოიყვანეს. რამდენიმე შემთხვევა დაფიქსირდა თბილისშიც, თუმცა სერიოზულ ზიანს ადგილი არ ჰქონია. 

კახეთის რეგიონში კი დიდთოვლობის გამო გზებზე რთული ვითარებაა. დიდთოვლობამ შეფერხებები დასახლებულ პუნქტებშიც გამოიწვია.
თელავში თოვლს ყინვაც დაერთო და ქალაქში მოძრაობა ჭირს. ამ დრომდე გზებზე მარილი არაა დაყრილი, რის გამოც რამდენიმე ავტომობილი უკვე მოცურდა. 

მთელი ღამის განმავლობაში გომბორზეც თოვდა, რის გამოც ავტომობილებისთვის გარკვეული შეზღუდვებია დაწესებული.