ეკა ხერხეულიძე: არანაირი უფლება არ აქვს ხელისუფლებას, პოლიტიკური კურსი შეცვალოს

პოზიცია - 21:32, 15 Dec, 2012

1756

რაც არ უნდა განცხადებები ვაკეთოთ იმასთან დაკავშირებით, რომ ჩვენი კურსი არის პროდასავლური, ვერცერთ შემთხვევაში ვერ გაითავისებს ამას ჩვენი დასავლელი პარტნიორი.“- აცხადებს საინფორმაციო სააგენტო ,,ნიუპოსტთან“ საუბარში უმცირესობის ერთ-ერთი ლიდერი, ეკა ხერხეულიძე და მიიჩნევს, რომ ახლა თუკი ხელისუფლებას სურს, დასავლეთს დაანახოს, რომ რასაც აცხადებს, ეჭვგარეშეა, მაშინ გაუგებარი მოტივებით ადამიანების დაბარებები პროკურატურაში მის მიერ დეკლარირებულ განცხადებებთან თანხვედრაში არაა.

_ ქალბატონო ეკა, დავით საყვარელიძე, რომელსაც გამუდმებით იძახებენ დაკითხვაზე და ისიც არ მიდის, ბრიუსელში იმყოფება. როგორ ფიქრობთ, კოჰაბიტაციის შესახებ დეკლარირებული განცხადებები ასეთი ტიპის ურთიერთობებთან თანხვედრაშია?

_ მთელ იმ ეჭვებსა და შეკითხვებს, რაც ვიზიტს უკავშირდება, მალე გაეცემა პასუხი, რაც შეეხება პროკურატურის დამოკიდებულებას, მე ვფიქრობ, რომ აბსოლუტურად მომაბეზრებელია ყოველდღიური დაძაბული რეჟიმი. ისინი ცდილობენ, რომ სტრესის ქვეშ აცხოვრონ საზოგადოება. დათო გახლავთ დეპუტატი მან ახსნა-განმარტება მისცა საზოგადოებს. საყვარელიძე არ გაურბის კითხვებს და ნებისმიერ შემთხვევაში, როგორც კი საქმის თვალსაზრისით იქნება თავისუფალი, პროკურატურაში მივა.

იქიდან გამომდინარე, რომ მასთან არ აქვთ სერიოზული კითხვები და საქმე ეხება რამდენიმე ხნის წინ გაურკვეველ თუ გარკვეულ ფაქტს ვერ გეტყვით, ამასთან დაკავშირებით, ახლა, ზუსტი ინფორმაცია არა მაქვს. რა თქმა უნდა, იგი საჯაროდ გასცემს პასუხებს საზოგადოებას. ამით, მისი ამომრჩეველი მკაფიოდ გაიცნობს საყვარელიძის საქმიანობას. მას ურჩევნია, საჯაროდ გასცეს პროკურატურის ყველა შეკითხვას პასუხი.

_ რამდენად სარწმუნოა თქვენთვის ის დეკლარირებული განცხადებები ახალი ხელისუფლების მხრიდან, რომ მხოლოდ დამნაშავე დაისჯება და არანაირ შემთხვევით და სერჩევით სამართალს ადგილი არ ექნება?

_ნებისმიერ შემთხვევში არსებობს უნდობლობა. ეს უნდობლობა არსებული ხელისუფლების მიმართ უფრო ჭრის, ვიდრე ოპოზიციის მიმართ. მუდმივ რეჟიმში ჰყავთ ადამიანები დაბარებული პროკურატურაში, არავინ არ იცის, როდის დაიბარებენ და არასდროს არ სრულდება არცერთი საქმე. ჩვენ თუ გავიხსენებთ გუნავას საქმეს, იგი ითხოვს, პასუხი გაეცეს მისდამი უსამართლო ქცევას. დასკვნა საზოგადოებისთვის არის ცნობილი, მას არ უმტკიცდება იგივე ნარკოტიკის მოხმარება, რაც ბრალდებოდა. აქედან გამომდინარე, რა კოჰაბიტაციაზეა საუბარი? ყოველ შემთხვევაში, მე როგორც ოპოზიცია, ყოველთვის გამოვხატავ სურვილს შენთან ურთიერთობის, და შენ არასდროს არ ასრულებ ამას და მუდმივად ტოვებ კითხვის ნიშნებს, ესაა კოჰაბიტაცია?

გაიხსენეთ, როგორ იყო კალანდაძისა და გუნავას შემთხვევაში, მათ ბოდიში უნდა მოიხადონ და თქვან, რომ რაღაც ნაწილში ისინი შეცდნენ, ამით ისინი უფრო მეტ ნდობასა და ლეგიტიმაციას მოიპოვებენ. სხვა შემთხვევაში, მე არ მესმის, ვინ დაემალა მაგალითად, გამოძიებას? თვით დათო საყვარელიძე, რომელიც ამ კვირაში ყველაზე აქტუალური გახლავთ, მანაც კი განაცხადა სრული მზადყოფნა პროკურატურასთან თანამშრომლობაზე.

_ თქვენ გუნავა ახსენეთ. მან დაამტკიცა უდანაშაულობა, რეაგირების პროცესი კი აგვიანებს. მხოლოდ შსს მინისტრის განცხადება გვაქვს, რომ თუ გუნავა მართალი აღმოჩნდება, თანამშრომლების პასუხისმგებლობის საკითხს დააყენებს. რატომ არ გადადის მაშინ შსს რეალურ ქმედებაზე?

-უკვე დამტკიცდა,რომ თენგიზ გუნავა არ არის დამნაშავე და დრო დადგა იმ ადამიანების და სამართალდამცავების პაუხისმგებლობა დააყენონ, რომლებმაც იგი დააკავეს. თენგო გუნავამ სწორედაც რომ დაამტკიცა მისი უდანაშაულობა, მე ვფიქრობ, რომ არ დარჩენილა ჩვენთან არცერთი ადამიანი, ვისთვისაც კომენტარი უთხოვიათ და თენგო გუნავას მხარდასაჭერად განცხადება არ გაუკეთებია. ასე რომ, მე მართლა არ მაქვს ეს წარმოდგენა, სხვა შემთხვევაში, სხვა ადამიანების და პერსონების მიმართ უკმარისობის გრძნობა მქონია, მაგრამ თენგოს მხრივ, ნამდვილად არა.

_ ეს საკითხები, რაც აქტუალურია და მითუმეტეს, ყოველდღიურ რეჟიმში იხილება, არც დასავლეთისთვის არის უცხო. რა ინფორმაცია გაქვთ, დავით საყვარელიძის ბრიუსელში ვიზიტი, გარკვეულწილად, ამ ბოლო დროინდელ დაკავებებზე უცხოელებთან საუბრის მცდელობასაც ხომ არ უკავშირდება?

_ ჩვენ ძალიანაც რომ მოვინდომოთ, გვერდს ვერ ავუვლით ამ საკითხს, ვინაიდან დასავლეთი მთლიანად მოტივირებულია და მათი ყურადღება მომართულია მხოლოდ და მხოლოდ საქართველოსკენ. მნიშვნელობა არ აქვს, ვიზიარებთ თუ არა უმრავლესობის პოზიციებს,რადგან ეს არის საზოგადოების მიერ არჩეული ხელისუფლება და ბუნებრივია, პოზიციაცა და ოპოზიციაც ერთობლიობაში განვიხილებით.

დასავლეთის ყურადღება აბსოლუტურად არის ჩვენსკენ მიმართული და ბუნებრივია, რეკონენდაციები, რასაც წერენ ჩვენი დასავლელი პარტნიორები, უნდა იყოს ანგარიშგასაწევი ჩვენი ხელისუფლებისთვის. თუ ამას არ გავაკეთებთ, ჩვენ სრულ იზოლაციაში აღმოვჩნდებით და ვიქნებით გამონაკლისი ქვეყანა, რომელსაც არ ესმის მითითებების, რომელსაც არ სურს ინტეგრირება დასავლეთთან.

რაც არ უნდა განცხადებები ვაკეთოთ იმასთან დაკავშირებით, რომ ჩვენი კურსი არის პროდასავლური, ვერცერთ შემთხვევაში ვერ გაითავისებს ამას ჩვენი დასავლელი პარტნიორი, თუ მათ მითითებებს არ გავიზიარებთ.

_ ერთი შეხედვით, თქვენი და ახალი ხელისუფლების საგარეო კურსი მაქსიმალურად იდენტური ჩანს, მაგრამ წამოწყებული დიალოგი რუსეთთან, რომელიც განსხვავდება თქვენი სურვილებისგან, რამდენად ემთხვევა ზოგადქართულ ინტერესს. ანუ რამდენად შესაბამისობაშია ერთის მხრივ ნატოში ინტეგრირება და მეორეს მხრივ, ურთიერთობის დარეგულირების მცდელობა რუსეთთან?

_ მიუხედავად იმისა, რომ ფუნდამენტარული სხვაობები, რა თქმა უნდა, არის ჩვენსა და ამ ხელისუფლებას შორის, მე იმედს ვიტოვებ, რომ ისინი დასავლურ კურსზე უარს არ იტყვიან და ვერ იტყვიან, ვინაიდან ეს შეუქცევადი პროცესია. ნატოსადმი დადებითი დამოკიდებულება საქართველოს მოსახლეობის თუ არ მეშლება 78% დააფიქსირა, აქედან გამომდინარე არანაირი უფლება არ აქვს დღევანდელ ხელისუფლებას, რადიკალურად შეცვალოს პოლიტიკური კურსი და თუ კი ამას იზამს, მას მოჰყვება საზოგადოების აღშფოთება. ამ კურსს არავინ დაანებებს ხელისუფლებას. ყველაზე ცუდ შემთხვევაში, თუკი ის ინიღბება იმ მანტიაში, რომ ის არის დასავლეთის კურსის მატარებელი - ეს მე არ მჯერა. ჩემი დამოკიდებულება თუ გაინტერესებთ ამ თემასთან დაკავშირებით, გეტყვით იმას, რომ როგორც კი ხელისუფლება ხმამაღლა დააფიქსირებს საგარეო კურსის ცვლილებას, ეს აბსოლუტურად ამოუვსებელ ნაპრალს გააჩენს მათსა და საზოგადოებას შორის, ეს იქნება მათი დამარცხების წინაპირობა.

_ გრიგორი კარასინის და ზურაბ აბაშიძის შეხვედრა რამდენად შედეგიანი იქნება და საერთოდ თვლით თუ არა, რომ შეხვედრას აზრი აქვს?

_ საქმე იმაში გახლავთ, რომ ნებისმიერ შემთხვევაში ხელისუფლების მცდელობა, რომ მას აქვს ამბიცია ახალი ფურცლიდან დაიწყოს რუსეთთან ურთიერთობა, არ არის საგანგაშო. აუცილებელია, პროცესები იყოს გაჭვირვალე, ვინაიდან საზოგადოებას კარგად ახსოვს, რომ სულ ცოტა ხნის წინ, რუსეთის მიერ მოხდა საქართველოს ტერიტორიების ოკუპირება. თუკი ნებისმიერი მილაპარაკება ამ წითელ ხაზზე გაივლის, ბუნებრივია, ქართული საზოგადოება იქნება შემწყნარებელი,თუკი არის საუბარი მხოლოდ და მხლოდ ეკონომიკურ ურთიერთობებზე, რაც მაინც წინაპირობა გახლავთ იმ დიდ პოლოტიკაში გასავლელად, ბუნებრივია ამის წინააღმდეგი ნამდვილად არავინ იქნება და თუკი ბაზარი გაიხსნება, საუკეთესო გადაწყვეტილება იქნება ქართველი გლეხისთვის.

ქართული პროდუქციის გატანა რუსეთის ბაზარზე უფრო ადვილია, ვინაიდან ის გახლავთ ჩვენი მეზობელი ქვეყანა. მე ვფიქრობ, რომ ეს არის ნორმალური, მაგრამ ჩვენ გვაქვს უამრავი მაგალითი იმასთან დაკავშირებით, რომ რუსეთი არასდროს კმაყოფილდება ჩარჩოებში მიღწეული მოლაპარაკებებით, ვინაიდან მას ახასიათებს საკუთარი მხარისათვის მაპროვიცირებელი მიზნები და მიღწევები.

აქედან გამომდინარე, მე მაქვს დიდი ეჭვი,როდესაც ქვეყანა გელაპარაკება, რომ ომი დაიწყე შენ და ოკუპირებული არ გახლავს საქართველოს ტერიტორიები,რომ მათ

სამართლიანობა აღადგინეს საკუთარ ტერიტორიაზე, ამის შემდეგ მე არ ვიცი, რა საუბარი უნდა წარიმართოს ამ ორი ქვეყნის წარმომადგენლებს შორის, ჩემი გონება ვერ ხვდება, რანაირად უნდა გაიმართოს ამ მოლაპარაკების ფორმატი. მე რომ ვიყო საქართველოს დესპანი, შვეიცარიაში კარასინთან შეხვედრაზე პირველ კითხვას დავუსვამდი - აღიარებს თუ არა ის საქართველოს ტერიტორიულ მთლიანობას?

მიუხედავად იმისა, რომ შიშის ლეგიტიმაცია საკმაოდ მაღალია ამასთან დაკავშირებით, მე თავს შევიკავებ,რადგან რისკი ნამდვილად არის. ჩვენ სახეზე გვაქვს უახლესი ისტორიის მანძილზე რუსეთის ტყუილები, მე არასდროს არ ვყოფილვარ გულუბრყვილო ამ საკითხების მიმართ, მაგრამ ამგვარი დამოკიდებულება იყო საზოგადოების და მითუმეტეს ხელისუფლების მხრიდან, შევარდნაძის დროს ვგულისხმობ, რომელიც გამუდმებით იტყუებოდა, რომ დსთ-ში ჩვენ შევდიოდით მხოლოდ და მხოლოდ იმიტომ, რომ დაგვებრუნებინა აფხაზეთი.

მაპატიეთ, მაგრამ შედეგები ცნობილია. მე არ ვენდობი ამ პერიოდის რუსეთს და იმედი მაქვს, რომ ეს რეჟიმი შეიცვლება, ვინაიდან მასთან ურთიერთობა, როგორც მეზობელთან, მნიშვნელოვანია ჩვენი ქვეყნისთვის.

_ რამდენად სერიოზული იყო დსთ-ში საქართველოს კვლავ შესვლის შესახებ საუბარი ამჯერად ლუკაშენკოს მხრიდან, რომელიც რატომღაც საეჭვოდ დაემთხვა საქართველოში ხელისუფლების ცვლილებას?

_ რა თქმა უნდა, ამ თემაზე საუბარი მიმდინარეობს და მას მოკავშირეებიც ჰყავს, ნებისმიერი ადამიანი რომელიც იმ პირობებში, რომლებზეც წეღან ვისაუბრე, ხდება ხელისუფლების წევრი მაგალითად, როგორებიც არიან კობა დავითაშვილი, კუკავა, ნინო ბურჯანაძე და სხვანი. ისინი დადიოდნენ რუსეთში და მოწყალებას თხოულობდნენ, მიუხედავად იმისა, რომ მათ ხშირ შემთხვევებში მაღალი ეშელონების მქონე პიროვნებები არ ხვდებოდნენ და დამცინავად ხვდებოდა ჟირინოვსკი, რომელიც შემდეგ აბუჩად იგდებდა მათ ვიზიტს.

ბუნებრივია, ასეთ ადამიანებს ჩვენი ქვეყნისთვის სარგებლის მოტანა არ შეუძლიათ.

ნინო ბურჯანაძე ,,პაკლონაია გარა“-ზე იყო მაშინ, როდესაც ის იყო ოპოზიციაში და ამის კადრები არსებობს. ეს არის სულ რამდენიმე წლის წინანდელი კადრები და მე შემიძლია ეს კადრები თქვენს სააგენტოს მივაწოდო. როდესაც ის ბრძანდებოდა საქართველოს ხელისუფლებაში, საკმაოდ მწვავე განცხადებებით გამოირჩეოდა რუსეთის დუმის მიმართ და მე ამაყი ვიყავი, როგორც რიგითი ქართველი, მას შემდეგ მისი კურსი შეიცვალა, როგორც კი ის წავიდა ოპოზიციაში, აღმოჩნდა პუტინის მოკავშირე და მას ელაპარაკებოდა საქართველოში ერთობლივი კონცეფციის შემუშავებაზე, როგორ უნდა დამხობილიყო საქართველოს კანონიერი ხელისუფლება.

_ არ შეიძლება არ გკითხოთ ფართომასშტაბიანი ამნისტიის შესახებ, რომელიც გარკვეულწილად უკვე მოინათლა შინაურ პატიმართა სიად. რამდენად აქვს გამართლება მასობრივ ჰუმანურ აქტს, როგორც ეს დეკლარირებულია?

_არანაირი გამართლება არა აქვს იმ სიტყვებს, რომ ამინისტია გახლავთ ჰუმანური აქტი, რადგან მსგავს არაჰუმანურობას, რასაც ეხლა ჩვენ მივიღებთ, არ შეიძლება სწორი ვუწოდოთ. სულ მალე იმდენი ოჯახი დადგება საფრთხის წინაშე და საზოგადოება დაიზაფრება და უბრალოდ საღამოს საათებში მათ არ შეეძლებათ გარეთ გასვლა, არანაირი ამინისტია მე ამად არ მიღირს.

შესაძლებელია მსუბუქი დანაშაულის მუხლებზე ამინისტიის გამოცხადება, მე აბსოლუტურად სოლიდარული ვარ. როდესაც ხელისუფლება საუბრობს შეკრებითობის გაუქმებაზე, არცერთ შემთხვევაში არ შეიძლება ამგვარი დანაშაულის მქონე ადამიანების სასჯელის განახევრება და მათ განთავისუფლებაზე ხომ ზედმეტია საუბარი. მათ სხვა ფუნქცია არ გააჩნიათ, ამ ადამიანებმა არ იციან სხვა ცხოვრების წესი, ბუნებრივია მათი მახინჯი ცხოვრება მშვიდობიანი მოქალაქეების ცხოვრებაზე აისახება.

აქედან გამომდინარე, მე არ ვიცი, ვინ იქნება ამაზე პასუხისმგებელი, ვინაიდან პრემიერი თავიდან იცილებს ამას და ამბობს, რომ გაგებით უნდა მოვეკიდოთ აფეთქებებს, კრიმინოგენულ სიტუაციას. მაპატიეთ, მაგრამ მე ამ ქვეყანაში ვაპირებ ცხოვრებას და ვერცერთ შემთხვევაში ვერ მოვეკიდები გაგებით, როდესაც ჩემი ქალაქი არის საფრთხის ქვეშ.

_ ასევე გახმაურებული თემაა პოლიტპატიმრები. თქვენ ახლა, როცა ხელისუფლებაში არ ხართ, აღიარებთ მათ არსებობას?

_ჩემი დამოკიდებულება პოლიტპატიმრებთან დაკავშირებით არის მკაფიო - საქართველოს არ ჰყოლია პოლიტიკური ნიშნით დაპატიმრებული ადამიანები. ადამიანებს, რომლებსაც აქვთ კრიმინალური საქციელი ჩადენილი და ამას ერთვის მისი პოლიტიკური დამოკიდებულება ხელისუფლების მიმართ, არ შეიძლება მისი პოლიტპატიმრად ჩათვლა. ამას ვერ არჩევენ პროექტის შემდგენლები, მათ შორის, ეკა ბესელია.

პოლიტდევნილია იგორ გიორგაძე, რომელიც ტერორისტული აქტების დამგეგმავი გახლდათ საქართველოში? ეს ცალკე უბედურებაა და მე არ შემიძლია იმ წვრილ დანაშაულებებში ბრალდებულებს გავუტოლო ის.

ადამიანები,რომლებიც მოხვდნენ პოლიტპატიმართა სიაში, კაკაბაძის და ბესელიას უმსგავსო გადაწყვეტილებით, მათი გადაწყვეტილება მწარედ ვიგემეთ რამდენიმე დღის წინ. იმ ადამიანებს შორის, რომლებიც მათ სიაში შეიყვანეს, არიან კრიმინალები, ტერორისტები და რუსეთის ჯაშუშები. საქართველო ამ ლაქას ძალიან დიდი ხნის მანძილზე ვერ ჩამოირეცხავს.

ეკა ბესელიას სიაში შეტანილნი არიან ისეთი ადამიანები, რომლებიც მისი ადვოკატობის დროს მისი კლიენტები იყვნენ და ეს არის აბსოლუტური სიმართლე, ეს ინფორმაცია ღია და გამჭვირვალეა. ახლა აიღო თუ არა ეს მონაცემები თავისი გვერდიდან, ნამდვილად ვერ გეტყვით.

მე მაინც, როგორც მოქალაქეს, ნამდვილად მგონია, რომ მასობრივი დაპატიმრებები გაგრძელდება მანამდე, სანამ რუსეთისგან მკაფიო მითითებებს არ მიიღებს დღევანდელი ხელისუფლება და მკაფიოდ არ იქნება გამოხატული საქართველოს კურსი საით იხრება. აქედან გამომდინარე, ცხადი გახდება, გაგრძელდება თუ არა დაპატიმრებები.

დღეს უკიდურესად არის იგნორირებული ხელისუფლების მიერ დასავლეთის რეკომენდაციები, რაც ნიშნავს იმას, რომ ისინი არ აპირებენ გრძელვადიან ურთიერთობას დასავლეთთან, ეს არის ჩემთვის ძალიან ადვილი გასაგებია.

ჟანა ასანიძე

საინფორმაციო სააგენტო ნიუპოსტი