ვანო მერაბიშვილის სარჩელის განხილვა სააპელაციო სასამართლოში 14 ივლისს, 16:00 საათზე განახლდება

სამართალი - 17:53, 16 Jun, 2014

1244

შინაგან საქმეთა ყოფილი მინისტრის ვანო მერაბიშვილის სარჩელის განხილვა 26 მაისის საქმეზე, სააპელაციო სასამართლოში 14 ივლისს, 16:00 საათზე განახლდება.

დღევანდელ პროცესზე დაცვის მხარემ დასკვნითი სიტყვა წარმოთქვა, მომავალ პროცესზე კი დასკვნით სიტყვას პროკურორი იტყვის.

როგორც პროკურორმა აღნიშნა, ადვოკატებს საკუთარ სიტყვაში არც ერთი დამატებითი გარემოება არ დაუსახელებიათ, რის გამოც საქალაქო სასამართლოს გადაწყვეტილება სააპელაციომ უნდა შეცვალოს.

მისი თქმით, პროკურატურას იმედი აქვს, რომ ძალაში დარჩება საქალაქო სასამართლოს გადაწყვეტილება, რომლის მიხედვითაც, ვანო მერაბიშვილს 26 მაისის საქმეზე 4 წლითა და 6 თვით თავისუფლების აღკვეთა შეეფარდა.

რაც შეეხება ადვოკატებს, მათი განცხადებით, საკუთარ დასკვნით სიტყვაში მათ დაადასტურეს, რომ განაჩენი პირველი ინსტანციის სასამართლოს მიერ ზეწოლით არის მიღებული.

დღევანდელ პროცესს ვანო მერაბიშვილიც ესწრებოდა. მან მოსამართლეებს სწორი გადაწყვეტილების მიღებისკენ რამდენჯერმე მოუწოდა. ბოლო მოწოდების შემდეგ კი, როდესაც იგი მოსამართლემ გააჩერა, ვანო მერაბიშვილმა დარბაზი პროტესტის ნიშნად უსიტყვოდ დატოვა.

26 მაისის საქმეზე ვანო მერაბიშვილს საქალაქო სასამართლომ 4 წლითა და 6 თვით თავისუფლების აღკვეთა შეუფარდა. მას ბრალად დაედო სამსახურებრივი უფლებამოსილების გადამეტებით 26 მაისის აქციის მონაწილეთა მიმართ ძალის გადამეტების ბრძანების გაცემა.