ბაკურიძე ხელისუფლებისგან იმ გარდაცვლილ პატიმართა ოჯახებისთვის, რომლთა დაღუპვაშიც ბრალი სახელმწიფოს მიუძღვის, კომპენსაციების გამოყოფას მოითხოვს.
,,ვარდების რევოლუციის" შემდეგ ადამიანის უფლებათა დარღვევის კუთხით არსებული ვითარება ყველასთვის ცნობილია. გარდა ამისა, ცნობილია ასევე ისიც, რომ ამ კუთხით ყველაზე რთული უბანი ქართული პენიტენციური სისტემა იყო, სადაც ყველაზე რთული ვითარება სამედიცინო მომსახურების მხრივ იყო შექმნილი. მთელი ამ წლების განმავლობაში არავინ ზრუნავდა მათ ჯანმრთელობაზე. როცა პატიმრები გადამდები სენით იყვნენ დაავადებული, მათი იზოლირება არ ხდებოდა. შესაბამისად, ავადმყოფთა რიცხვი იზრდებოდა. ციხე სადამსჯელო მოედნად იყო ქცეული, სადაც პატიმართა გამოსწორებაზე, მათ რესოციალიზაციაზე არავინ ზრუნავდა. იქ დამკვიდრებული იყო ცემა, წამება არაადამიანური მოპყრობა. ფაქტობრივად, არ ხდებოდა ადმინისტრაციის იმ წარმომადგენლების დასჯა, რომელთაც პატიმრების ცემა-წამებასთან, თუ აბუჩად აგდებაში ბრალი მიუძღოდათ", - განაცხადა ბაკურიძემ.



ბაკურიძის განცხადებით,  ბოლო ხუთი წლის განმავლობაში  არაოფიციალური მონაცემებით  5 000 პატიმარი გარდაიცვალა საპატიმროებში.

,,ოვითხოვთ, რომ სასჯელაღსრულების სამინისტრომ დაადგინოს, თუ რამდენი ადამიანი დაიღუპა სააკაშვილის მმართველობის პერიოდში ქართულ ციხეებში. ამასთან, გამოძიებული იქნას თითოეული დაღუპული პატიმრის საქმე და იმ შემთხვევაში, თუ მის გარდაცვალებაში ბრალი სახელმწიფოს მიუძღვის, მაშინ ხელისუფლებამ ყველა გარდაცვლილი პატიმრის ოჯახზე ფინანსური დახმარება ბიუჯეტიდან გამოყოს. ვერანაირი დახმარება ვერ აუნაზღაურებს ამ ოჯახებს დანაკარგს, მაგრამ სახელმწიფომ თავისი წილი პასუხისმგებლობა უნდა აღიაროს", - განაცხადა ბაკურიძემ.