რომან შამათავა კვლავ პატიმრობაში დატოვეს

სამართალი - 16:41, 07 Jun, 2014

2506

თავდაცვის სამინისტროს დაზვერვის დეპარტამენტის ოფიცრის პაატა ქარდავას საქმეზე ბრალდებულ აფხაზეთის კუდ-ის ყოფილ უფროსს, რომან შამათავას სასამართლომ აღმკვეთი ღონისძიების სახით პატიმრობა შეუფარდა.

პროკურატურა მის პატიმრობაში დატოვებას ითხოვდა. აღნიშნული შუამდგომლობის მოტივი იყო ის, რომ შამათავა არის ბრალდებული ასევე ხურჩის ტერაქტსი საქმეში, ამ საქმეში მას პატიმრობის ვადა 21 ივლისს გასდის და შესაძლოა მან გავლენა მოახდინოს მოწმეებზე ან მიიმალოს.

ადვოკტების თქმით, არ არსებობს საფრთხე რომ ის მიიმალოს, ან მოწმეებზე გალენა მოახდინოს, ადვოკატ რომეო საჯაიას განცხადებით, გაუგებარია, რატომ მოხდა წინასაარჩევნოდ ამ თემის წამოწევა, როცა 4 მოწმის ჩვენება მათ ერთი წლის წინ აქვთ მიღებული. შამათავა ამბობს, რომ ის პაატა ქარდავას არ იცნობდა და ტელევიზორში ნახა პირველად.

რომან შამათავა, რომელიც აფხაზეთის კუდ-ის ყოფილი უფროსია, ე.წ. ხურჩის ტერაქტის საქმის ფარგლებში იმყოფება წინასწარ პატიმრობაში. ქარდავას ახალი ბრალდება რამდენიმე დღის წინ წაუყენეს.

გამოძიების ინფორმაციით, 2008 წლის აგვისტოს ბოლოს საქართველოს შინაგან საქმეთა სამინისტროს კონსტიტუციური უსაფრთხოების დეპარტამენტის აფხაზეთის მთავარი სამმართველოს უფროსმა რომან შამათავამ საქართველოს შინაგან საქმეთა სამინისტროს განსაკუთრებულ დავალებათა დეპარტამენტის თანამშრომლებს დაავალა საქართველოს თავდაცვის სამინისტროს დაზვერვის დეპარტამენტის ოფიცრის, პაატა ქარდავას თავისუფლების უკანონოდ აღკვეთა და ბათუმში ჩაყვანა.

მიღებული დავალების შესაბამისად, 2008 წლის 27 აგვისტოს, ქ. ზუგდიდში არსებული ფოსტის შენობის მიმდებარედ, დანაშაულებრივი ჯგუფის წევრებმა ცეცხლსასროლი იარაღის მუქარით თავისუფლება უკანონოდ აღუკვეთეს პაატა ქარდავას, რომელიც გადაადგილდებოდა პირად სარგებლობაში არსებული "მერსედესის" მარკის ავტომანქანით და წაიყვანეს ფოთის მიმართულებით.

"რომან შამათავამ და მისმა თანამზრახველებმა პაატა ქარდავა გადაიყვანეს ბათუმში და მიიყვანეს შავი ზღვის ნავმისადგომთან, სადაც რომან შამათავა პაატა ქარდავას აფხაზ სეპარატისტებთან თანამშრომლობაში ადანაშაულებდა, რის შემდეგაც მან ფიზიკური შეურაცხყოფა მიაყენა პაატა ქარდავას, რომელიც თავის მხრივ კატეგორიულად უარყოფდა აღნიშნულს. რომან შამათავას დავალებით, მას და მისი ჯგუფის წევრებს ნავმისადგომთან ელოდებოდა აჭარის ავტონომიური რესპუბლიკის კუდ-ის მთავარი სამმართველოს მოტორიანი ნავი, რომელსაც მართავდა ამავე დანაყოფის თანამშრომელი. ბორკილდადებული და თვალებახვეული პაატა ქარდავა ჩასვეს აღნიშნულ ნავში, რომან შამათავამ მას ფეხზე მოაბა ბეტონის ნატეხი და შევიდნენ შავი ზღვის სიღრმეში, დაახლოებით 10 კილომეტრის მანძილზე, რა დროსაც რომან შამათავამ ცეცხლსასროლი იარაღიდან თავის არეში ერთი გასროლით მოკლა პაატა ქარდავა და ცხედარი ზღვაში გადააგდო.

ჩადენილი დანაშაულისთვის რომან შამათავა მიცემულია სისხლის სამართლის პასუხისგებაში თავისუფლების უკანონოდ აღკვეთისა და განზრახ მკვლელობის ბრალდებით.

საქმეზე გამოძიებას აწარმოებს სახელმწიფო უსაფრთხოების სააგენტოს საგამოძიებო მთავარი სამმართველო", - აღნიშნულია შს სამინისტროს განცხადებაში.

საქმე აღძრულია სისხლის სამართლის კოდექსის 143-ე მუხლის მე-4 ნაწილის ა ქვეპუნქტით და 109 მუხლის მე-2 ნაწილის ბ ქვეპუნქტით.