ნატო რუსეთს უკრაინის ახლად არჩეულ პრეზიდენტთან კონსტრუქციული თანამშრომლობისკენ მოუწოდებს. ამის შესახებ ნატო-ს გენერალურმა მდივანმა, ანდერს ფოგ რასმუსენმა ბრიუსელში, უკრაინის კრიზისის თაობაზე გამართული ნატო-რუსეთის საბჭოს სხდომის შემდეგ განაცხადა. რასმუსენმა რუსეთს, უკრაინის საზღვრებიდან ჯარების სრული გაყვანისკენ მოუწოდა.

"რუსეთთან ჩვენი პარტნიორობა დამყარებული იყო ვალდებულებებზე და რუსეთმა არ შეასრულა დანაპირები, დაემუქრა მეზობლებს და ძალა გამოიყენა მათ წინააღმდეგ. ნატო-ს ყველა მოკავშირემ ცხადად დააფიქსირა, რომ ჩვენ ვგმობთ ყირიმის უკანონო და არალეგიტიმურ ანექსიას. ჩვენ მივესალმებით უკრაინელი ხალხის მიერ საერთაშორისო სტანდარტების შესაბამისად თავისუფალი და სამართლიანი არჩევნების ჩატარებას. მათ მკაფიოდ დააფიქსირეს თავიანთი ხმა ერთიანი უკრაინისთვის. მათი არჩევანი უნდა დაფასდეს და მოვუწოდებთ რუსეთს კონსტრუქციული თანამშრომლობისკენ უკრაინის ახალარჩეულ პრეზიდენტთან", - განაცხადა ნატო-ს გენერალურმა მდივანმა.

ბრიუსელში, ნატო-ს წევრი-ქვეყნების თავდაცვის მინისტრები დღეს შეხვედრას გამართავენ, სადაც პირველად განიხილავენ რუსეთის პოლიტიკის გრძელვადიან სტრატეგიულ შედეგებს უკრაინასთან მიმართებაში.