“საკანონმდებლო ცვლილებების შედეგად, “კრაკადილის“, “ვინკისა“ და „ჯეფის“ მოხმარება 90%-ით შემცირდა“, - ამის შესახებ შს მინისტრის მოადგილე ლევან იზორიამ განაცხადა.

მისი თქმით, ახალი ხელისუფლება ნარკოპოლიტიკაში თანმიმდევრულია.

„მარიხუანა გაერო-ს სიებში მოცემულია, როგორც ჯანმრთელობისთვის ძალიან მავნე ნარკოტიკული ნივთიერება. შესაბამისად, ეს არ არის მხოლოდ საქართველოს გადაწყვეტილება და ინიციატივა. საქართველო, როგორც კონვენციის წევრი ქვეყანა, ამ სიებს აღიარებს, როგორც ნარკოტიკულ ნივთიერებებს და მარიხუანაზე გამონაკლისს არ უშვებს“, - განაცხადა იზორიამ.

მისი თქმით, წინა ხელისუფლების მკაცრმა ნარკოპოლიტიკამ შედეგად მოიტანა კლასიკური ნარკოტიკული საშუალებების შავი ბაზრიდან პრაქტიკული გადევნა და მისი ჩანაცვლება ჩანაცვლება ე.წ. სააფთიაქო ნარკომანიით.

“პრაქტიკულად, სახლემწიფომ ნარკოტიკული საშუალებების ლეგალიზება მოახდინა, იმიტომ, რომ არ იყო გარკვეული შეზღუდვები და კვოტები დაწესებული. მინდა, ვთქვა, რომ ჩვენ თანმიმდევრულები ვართ ჩვენს ნარკოპოლიტიკაში. ჩვენი საკანონმდებლო ცვლილებების შედეგად, ე.წ. “კრაკადილის“, “ვინკისა“ და „ჯეფის“ მოხმარება 90%-ით შემცირდა. მთავარია, ჯერ მათ შემოდინებას, უკანონო ბრუნვას ვებრძოლოთ და შემდეგ უკვე არსებობს ნარკომანიასთან ბრძოლის უწყებათაშორისი საბჭო, რომელიც მსჯელობს, რა შეიძლება, როგორი პოლიტიკა შევიმუშავოთ, განსაკუთრებით ნარკოდამოკიდებულ პირთან მიმართებაში. კერძოდ, საუბარია, გარკვეული სერვისების მიწოდებაზე, გარკვეული სარეაბილიტაციო ცენტრების აშენებაზე. მარტო იმის თქმა, რომ ყველაფერი დეკრიმინალიზებული უნდა იყოს, მერწმუნეთ, რომ ეს ჩვენი გენოფონდის ისევ სავალალო მდგომარეობაში ჩაყენებას გამოიწვევს, თუ რაღაც ალტერნატივაზე არ ვიფიქრეთ“, - განაცხადა იზორიამ.