კუდ-ის ყოფილი უფროსი დათა ახალაია საბერძნეთის საპატიმროს 2 ივნისს დატოვებს. ამის შესახებ ახალაიას ბერძენმა ადვოკატმა განაცხადა. მისი თქმით, პრობლემა გირაოს თანხის გადარიცხვისას შეიქმნა.

100 ათასი ევროს ოდენობის გირაოს გადახდისთვის საჭირო პროცედურას დათა ახალაიას ოჯახი და ადვოკატი მომავალ კვირას განახორციელებენ.

“ოჯახმა 100 ათასის შემოტანა ვერ მოახერხა. საბერძნეთში, ერთ დღეში თანხის შემოტანას ხელი ბიუროკრატიამ შეუშალა. დათა ახალაიას ციხიდან ორშაბათს ადგილობრივი დროით, 12:00 საათზე გამოუშვებენ”, – განაცხადა ალექსანდროს პაპასტეროპოლუსმა.

საბერძნეთის სასამართლომ დათა ახალაია გირაოს სანაცვლოდ გუშინ გაათავისუფლა. რაც შეეხება მის ექსტრადირებას, საბერძნეთის სასამართლო აღნიშნულ საკითხზე ორ თვეში იმსჯელებს.