ბესელია დათა ახალაიას გათავისუფლების ფაქტს ეხმაურება

სამართალი - 18:16, 29 May, 2014

2920

ადამიანის უფლებათა კომიტეტის თავმჯდომარე ეკა ბესელია, საბერძნეთის სასამართლოს მიერ კუდის ყოფილი მაღალჩინოსანის დათა ახალაიას გათავისუფლების ფაქტს ეხმაურება.

"დათა ახალაიასთან დაკავშირებით სახელმწიფოებს შორის მიმდინარეობს შესაბამისი სამართლებრივი პროცედურები და ეს საერთაშორისო თანამშრომლობის ფარგლებში ხდება. ახალაიასთვის მძიმე ბრალდებებია წარდგენილი, მათ შორის არის გახმაურებული ფაქტი, რომელიც ადამიანების სიცოცხლის ხელყოფას უკავშირდება.

როდესაც დადგება მისი ექსტრადიციის საკითხი, სასამართლო იმუშავებს და შესაბამისად, კანონის სრული დაცვით წარიმართება ყველაფერი. ამიტომ ჩვენ უნდა დაველოდოთ საბოლოო გადაწყვეტილებას", - განაცხადა ეკა ბესელიამ.

დათა ახალაიას სასამართლო პროცესი დღეს, ქალაქ პატრასში ჩატარდა. ყოფილ მაღალჩინოსანს 2 თვის განმავლობაში საბერძნეთის დედაქალაქიდან გასვლის უფლება არ ექნება.

სწორედ 2 თვის შემდეგ გაიმართება ბოლო სასამართლო პროცესი ამ საქმესთან დაკავშირებით, რომელზეც მოსამართლემ ახალაიას საქართველოში ექსტრადირების საკითხზე განაჩენი უნდა გამოიტანოს.

მანამდე ბერძნული მხარე საქართველოს მთავარი პროკურატურისგან ახალაიას წინააღმდეგ წაყენებულ ბრალდებებთან დაკავშირებულ მტკიცებულებებს ელოდება.

დღევანდელ სასამართლო პროცესს, დათა ახალაიას მამა და მეუღლე ესწრებოდნენ.