რამდენიმე თვის წინ უგზო-უკვლოდ გაუჩინარებული მალაიზიური ავიაკომპანიის თვითმფრინავის Boeing 777-200-ის შესახებ, ქვეყნის სამოქალაქო ავიაციის სამსახური ლაინერის გადაადგილების ახალ მონაცემებს აქვეყნებს, რომელიც აქამდე საჯარო არ იყო.

თანამგზავრიდან მიღებული მონაცემების გასაჯაროების შესახებ გადაწყვეტილება მალაიზიის ხელისუფლებამ მას შემდეგ მიიღო, რაც თვითმფრინავის მგზავრების ნათესავები მთავრობისგან კატეგორიულად მოითხოვდნენ არსებული მომაცემების გასაჯაროებას და მათ უმოქმედობასა და გულგრილობაში ადანაშაულებდნენ.

ისინი თანამგზავრიდან მიღებულ ინფორმაციას ითხოვდნენ, რათა დამოუკიდებელი ანალიზი გაეკეთებინათ.

გაუჩინარებული თვითმფრინავის საძიებო სამუშაოები ინდოეთის ოკეანეში ამ მონაცემების მიხედვით მიმდინარეობდა.

ინფორმაცია საინფორმაციო სააგენტო France Press-ში გამოქვეყნდა. 47-გვერდიანი მოხსენება მალაიზიის სამოქალაქო ავიაციის სამსახურმა ბრიტანულ კომპანიასთან ერთად შეადგინა.

Boeing 777-200, რომელიც მალაიზიიდან რეისს კუალა -ლუმპურა - პეკინს ასრულებდა, 7 მარტს, აფრენიდან ერთი საათის შემდეგ, რადარებიდან გაუჩინარდა. თვითმფრინავში 227 მგზავრი და ეკიპაჟის 12 წევრი იმყოფებოდა.

საძიებო სამუშაოებში ჩართული იყო 40 ხომალდი, 23 თვითმფრინავი და 11 ქვეყნის სამაშველო სამსახური, ასევე ამერიკის დაზვერვის სამსახური, თუმცა დღემდე ვერანაირ კვალს ვერ მიაგნეს.

წყარო: geonews.ge