რამდენიმე დღის წინ, კახეთში სტუმრად მყოფი თენგიზ კიტოვანი, თანხმლებ პირებთან ერთად, პოლიციამ გააჩერა და გაჩხრიკა. ამის შესახებ კიტოვანმა გაზეთ "პრაიმტაიმთან" ინტერვიუში განაცხადა. "ერთი კვირის წინ ვიყავი კახეთში, ბიჭები ისხდნენ ჩემთან ერთად, ცოტა მოძველბიჭოები. გაგვაჩერა პოლიციამ, გაგვჩხრიკეს. სამარცხვინო საქმე ჩაიდინეს. რას ეძებდნენ, არ ვიცი. ვუთხარი, კიტოვანს ჩხრეკავთ-თქო?", - ამბობს თენგიზ კიტოვანი.

მისი თქმით, კახეთში ნარკოტიკების შემოდინების ადგილების აღმოსაჩენად იმყოფებოდა.

"იმიტომ ვიყავი ჩასული, რომ დამედგინა, საიდან შემოდის ნარკოტიკები", - აცხადებს კიტოვანი და აღნიშნავს, რომ მისი ორგანიზაცია აქტიურად აპირებს ბრძოლას ნარკობიზნესის და გამსაღებლების წინააღმდეგ.

"არ დაგიმალავთ და გეტყვით, რომ უნდა მივმართოთ პრეზიდენტს, რათა რამდენიმე კაცს ჩვენი ორგანიზაციიდან მისცეს იარაღის ტარების უფლება. ჩვენ ამ ოპერაციას რომ ჩავატარებთ, იარაღიც საჭირო იქნება", - ამბობს კიტოვანი.