საიამ სახელმწიფო უწყებების მედიასთან მუშაობა შეაფასა

სამართალი - 14:23, 12 Dec, 2012

504

კვლევის პრეზენტაცია სასტუმრო ,,რედისონში" გაიმართა. საია-ს მედიის სამართლებრივი დაცვის ცენტრის კოორდინატორის ნათია კაპანაძის თქმით, ,,სამართლებრივი ანალიზი მომზადებულია საია-ს მიერ დაფიქსირებული ფაქტებისა და სხვადასხვა ადმინისტრაციული ორგანოდან გამოთხოვილი საჯარო ინფორმაციაზე დაყრდნობით. მისივე თქმით, კვლევის მიზანია საქართველოში მედიასთან ურთიერთობის სტანდარტის შესწავლა, არსებული პრობლემების გამოვლენა, საზოგადოების ინფორმირებულობა და გამოვლენილი პრობლემების მოგვარების გზების შეთავაზება. კვლევის შედეგად დადგინდა, რომ ადმინისტრაციულ ორგანოებს შემუშავებული აქვთ მედიასთან ურთიერთობის განსხვავებული სტანდარტები, უმეტეს შემთხვევაში მედიასთან ურთიერთობა არ წესრიგდება სპეციალური აქტით. მედიასა და ადმინისტრაციულ ორგანოებთან ურთიერთობაში არსებული პრობლემები უკავშირდება გადაწყვეტილების მიმღები პირების სუბიექტურ დამოკიდებულებას მედიისადმი", - განმარტა კაპანაძემ.

თამარ ჩუგოშვილის თქმით, არსებული პრობლემები უკავშირდება გავლენიანი ფიგურების დამოკიდებულებას მედიისადმი. კვლევის ფარგლებში, ბოლო 1 წლის განმავლობაში, საია-მ 50 საჯარო დაწესებულებიდან საჯარო ინფორმაცია გამოითხოვა.
ორგანიზაციის თავმჯდომარის, თამარ ჩუგოშვილის თქმით, აუცილებელია, რომ უახლოეს პერიოდში მოხდეს ადმინისტრაციულ ორგანოებსა და მედიის წარმომადგენლებს შორის ურთიერთობების სტანდარტის შემუშავება. მისივე თქმით, საჭიროა, რომ შეიცვალოს დამოკიდებულება და პოლიტიკა მედიის წარმომადგენლების მიმართ. ამასთან, თამარ ჩუგოშვილის განმარტებით, მნიშვნელოვანია, რომ მედია თავადვე გადავიდეს საქმიანობის კიდევ უფრო მაღალ სტანდარტზე და ჟურნალისტები ეთიკის ქარტიას შეუერთდნენ. საია-მ კვლევა IREX-ის G-მედია პროგრამის ფარგლებში განახორციელა.