,,მალე ყველასთვის ნათელი გახდება, რომ მომღერალი გიორგი ფოჩხუა ფოტოაპარატის გამო არ მოუკლავთ. უფრო სწორად, მის სიკვდილს სხვა სარჩული აქვს.
მგონი, ყველამ იცის, რომ მისთვის ბოროტმოქმედს ფოტოაპარატის წართმევა უნდოდა, რომლის საშუალებითაც მომღერალმა პრეზიდენტის ანაკლიაში ვოიაჟის ფოტოები დააფიქსირა. სწორედ იმ ფოტოების გასანადგურებლად იყო მიმართული გიორგი ფოჩხუაზე იერიში, რასაც მომღერლის სიცოცხლე შეეწირა. თუმცა, მოდით, ნუ გავუსწრებთ მოვლენებს, იმედია, ახლა მაინც ჩატარდება ობიექტური გამოძიება და ამ და სხვა, კვალის სპეციალურად ასაბნევად გაკეთებულ საქმეებს ფარდა აეხდება.
ხელისუფლების შეცვლიდან გარკ­ვეული დროის გასვლის შემდეგ ძალიან ბევრმა დაზარალებულმა მიმართა მთავარ პროკურატურას. თითქმის ყველა საქმე ისეთი აბურდული და უკანონოდ წარმართულია, რომ ახალ ხელისუფლებას და კონკრეტულად მართლმსაჯულებას ძალიან ბევრი და რთული სამუშაო აქვს წინ."- აცხადებს ადვოკატი.