ირაკლი ღარიბაშვილი: სოდის და კუდის გაუქმება საზოგადოებრივი დაკვეთა იყო

სამართალი - 11:40, 12 Dec, 2012

542

მინისტრმა სამინისტროში განხორციელებულ სხვა რეფორმებზეც ისაუბრა. ,,სოდ-ი და კუდ-ი უკანასკნელ წლებში მძიმე პოლიტიკურ-რეპრესიულ მანქანად გადაიქცა და მათი გაუქმება საზოგადოებრივი დაკვეთა იყო. ასევე, სერიოზული რეფორმები გვაქვს დაგეგმილი პოლიციის აკადემიაში. ამ თემაზე უცხოელ კოლეგებთან ინტენსიური კონსულტაციები მიმდინარეობს და ველით, რომ იანვრიდან აკადემიაში განახლებული სახის სწავლება დაიწყება. რეფორმები წარმატებულად მიმდინარეობს დროებითი მოთავსების იზოლატორებში არსებული მდგომარეობის კუთხითაც. ჩვენ სამინისტროში არჩევნებიდან მალევე ვერ შევედით და ამ პერიოდში პოლიცია იყო სრულად დემორალიზებული. ისინი დანაშაულზე არ რეაგირებდნენ, რითაც კრიმინალებმა ისარგებლეს და წვრილმანი დანაშაულის რიცხვმა მოიმატა. თუმცა ჩვენ დავიწყეთ პოლიციის რეორგანიზაცია, შევცვალეთ ყველა სამხარეოს უფროსი და პოლიციის უფროსები. შესაბამისად, მიმდინარე ეტაპზე სიტუაცია სტაბილურია, კრიმინალის რიცხვი მცირდება, დანაშაულის გახსნის სტატისტიკა კი მატულობს. შესაბამისად, დღეს პოლიციის მუშაობით კმაყოფილი ვართ", - აღიშნა ირაკლი ღარიბაშვილმა.

მინისტრმა კომენტარი ბოლო დროინდელ დაკავებებთან დაკავშირებითაც გააკეთა. მისი თქმით, სამწუხაროა, რომ ხელისუფლების ოპონენტები ამ დაკავებების პოლიტიკურ მოტივაციაზე საუბრობენ.

,,ჩვენ ამას, რა თქმა უნდა, ვერ დავეთანხმებით, რადგან მაქსიმალურად ფრთხილად ვეკიდებით თითოეული ადამიანის ბედს და ვიცავთ სამართლიანობის პრინციპებს. ჩვენ გვაქვს მყარი არგუმენტები და მტკიცებულებები თითოეულ საქმესთან დაკავშირებით და მზად ვართ ისინი ნებისმიერ დაინტერესებულ პირს მივაწოდოთ", - აღნიშნა ირაკლი ღარიბაშვილმა.