კოჟორიძე: სასჯელაღსრულებაში გაცემულ მაღალ პრემიებზე გამოძიება უნდა დაიწყოს

სამართალი - 13:15, 20 May, 2014

1501

საიას თავმჯდომარე კახა კოჟორიძე აცხადებს, რომ სასჯელაღსრულების დეპარტამენტის თანამშრომლებზე გაცემული მაღალი პრემიების საკითხზე გამოძიება უნდა დაიწყოს.

როგორც კოჟორიძე განმარტავს, გამოძიება მოროშკინას განცხადების გათვალისწინებით უნდა მოხდეს, რომელიც საიას თავმჯდომარის თქმით, ამტკიცებს, რომ სასჯელაღსრულების დეპარტამენტის თანამშრომლებმა მაღალი პრემიები ვანო მერაბიშვილის საკნიდან გაყვანის საკითხზე დუმილის გამო მიიღეს.

"ახლა, როცა ასეთი მნიშვნელოვანი ინფორმაცია ვრცელდება, არა რომელიღაც მოქალაქის, არამედ იმ ადამიანის მიერ, ვინც სისტემაშია დასაქმებული და აქვს გარკვეულ ინფორმაციაზე წვდომა, ცხადია, გამოძიება უნდა დაიწყოს. ამაში ორი აზრი არ შეიძლება იყოს. ძალიან მნიშვნელოვანია ის ინფორმაცია, რაზეც ქალბატონი მოროშკინა საუბრობს, ამიტომ გამოძიებამ ყველაფერი უნდა გააკეთოს იმისთვის, რომ გაირკვეს სიმართლე, მითუმეტეს, რომ უწყებაში აღნიშნულ საკითხზე გაკეთებული ურთიერთსაწინააღმდეგო განცხადებები კიდევ უფრო მეტ კითხვას აჩენს", - აღნიშნა კოჟორიძემ.

მისივე განმარტებით, სამართალდამცავმა ორგანოებმა უნდა გადაწყვიტონ, რომ აუცილებელია იმ ვალდებულების შესრულება, რაც მათ ეკისრებათ.

რამდენიმე დღის წინ ცნობილი გახდა, რომ სასჯელაღსრულების დეპარტამენტის ხელმძღვანელებმა საკმაოდ მაღალი პრემიები მიიღეს.