თურქი მაშველების განცხადებით, მაღაროში, სადაც აფეთქება მოხდა, უსაფრთხოების ზომები არ არსებობდა.

"იქ დასაქმებულმა ადამიანებმა არ იცოდნენ, ავარიის შემთხვევაში როგორ მოქცეულიყვნენ. ყველაზე გამოუცდელები აფეთქების შემდეგ გასასვლელისკენ გაიქცნენ და ადგილზე გაიგუდნენ ბუნებრივი აირით.

შედარებთ გამოცდილებმა კი თავი სიღრმეში შეაფარეს,სადაც სუნთქვის საშუალება ჰქონდათ", - აცხადებენ მაშველები.

ადგილობრივი მედიის ინფორმაციით, მაღაროს მმართველმა კომპანიამ ეკონომიის მიზნით არ განაახლა სავენტილაციო სისტემა, რამაც ავარიის შემდეგ ადამიანების გადარჩენის შანსი თითქმის არ დატოვა. მუშაობის არაადამიანურ პირობებზე საუბრობენ მაღაროში დასაქმებული ადამაინების ოჯახის წევრებიც.

თურქეთის მთავრობა პირობას დებს, რომ მომხდარს გამოიძიებს. მოსახლეობა კი, მათი გადადგომის მოთხოვნით, საპროტესტო აქციებს მართავს. ქალაქ იზმირში და სომაში დაახლოებით 20 ათასი ადამიანი გამოვიდა. მიტინგი პოლიციასთან შეტაკებით დასრულდა.

აქცია გაიმართა სტამბულშიც, მოსახლეობა მომხდარში მთავრობას ადანაშაულებს.

ბოლო მონაცემებით, მაღაროში მომხდარი აფეთქების შედეგად, გარდაცვლილთა რიცხვი 300-ს მიუახლოვდა.