ნატოს გენერალურმა მდივანმა ანდრეს ფოგ რასმუსენმა ბრატისლავაში მიმდინარე უსაფრთხოების სამიტზე, ნატოს ქვეყნებს თავდაცვაზე ხარჯების გაზრდისკენ მოუწოდა.

"უკრაინის სიტუაციაზე ნატოს პასუხს გრძელვადიანი ეფექტი უნდა ჰქონდეს; დროა შეწყდეს თავდაცვის უნარზე ხარჯების შეკვეცა", - განაცხადა ნატოს გენერალურმა მდივანმა.

რასმუსენმა აღნიშნა, რომ ის, რასაც ახლა უკრაინაში ვხედავთ - ევროპის უსაფრთხოების საფუძვლებს ანგრევს.

მან გაიხსენა, რომ რუსეთის თავდაცვითი ხარჯები, ბოლო 5 წლის მანძილზე, ყოველწლიურად 5%-ით იზრდებოდა. ამისგან განსხვავებით, ბევრმა ევროპულმა ქვეყანამ, რომლებიც ნატოში შედიან, თავისი თავდაცვითი ხარჯები, ამავე დროში, 20%-ზე მეტით, ზოგიერთმა კი 40%-ითაც კი შეამცირა. "შემცირებები განსაკუთრებით მნიშვნელოვანი იყო აქ, ცენტრალურ-აღმოსავლეთ ევროპაში. ამის დაშვება არ შეიძლება. დადგა დრო ეს დამთავრდეს და ეს ტენდენცია შეიცვალოს", - დარწმუნებულია ნატოს გენერალური მდივანი.

როგორც კარგი მაგალითის ქვეყანა, რომელიც თავდაცვის გაზრდაზე შესაბამის სახსრებს გამოყოფს, მან ესტონეთი დაასახელა. ნატოს ქვეყნების ვალდებულებები თავდაცვისუნარიანობაზე ხარჯებში მთლიანი შიდა პროდუქტის 2%-ს ითვალისწინებს. ჩრდილოატლანტიკური ალიანსის ლიდერმა აღნიშნა, რომ პოლონეთი ამ მიზანთან ძალიან ახლოსაა.

"ჩვენ ყველაზე მეტად, ვიდრე ოდესმე, უნდა ვიყოთ თავდაცვისათვის მომზადებული და უნარიანი", - ხაზი გაუსვა მან.

რასმუსენმა ასევე აღნიშნა, რომ ნატოს კარი არის და იქნება ღია არამხოლოდ უკრაინისთვის, არამედ სხვა ქვეყნებისთვისაც, რომელთაც ნატოში ყოფნა სურთ.