პროკურატურამ ლაგოდეხის რაიონში არასრულწლოვანი გოგონას მოტაცებისა და გაუპატიურების საქმეზე გამოძიება დაიწყო. აღნიშნული ინფორმაცია „ნიუპოსტს“ პროკურატურის პრესსამსახურში დაუდასტურეს.

„საგამოძიებო მოქმედებები ინტენსიურად მიმდინარეობს. არასრულწლოვანმა, რომელიც თარჯიმნის და პედაგოგის მონაწილოებით დაიკითხა, პირველი დაკითხვისას გამოძიება სხვა მიმართულებით წაიყვანა. მან დანაშაულის ჩადენის ფაქტზე არ მიუთითა და განაცხადა, რომ ნებით გაჰყვა შეყვარებულს. მანვე სქესობრივ კონტაქტზე საუბრისგან თავი შეიკავა იმ მოტივით, რომ აღნიშნული მათ პირად ცხოვრებას ეხებოდა. ექსპერტიზის დასკვნით დგინდება, რომ არასრულწლოვანს გაუპატიურებისთვის დამახასიათებელი დაზიანებები არ აღენიშნება. განმეორებით დაკითხვისას მან შეცვალა ჩვენება და განმარტა, რომ მისი თავისუფლება აღვეთეს და გააუპატიურეს. გამოძიება ამჟამად სხვა ვერსიაზე მუშაობს,“, - აცხადებს „ნიუპოსტთან“ საუბარში პროკურატურის პრესსამსახურის უფროსი.

აღნიშნული შემთხვევა ლაგოდეხის რაიონში რამდენიმე დღის წინ მოხდა. 15 წლის გოგონა 17 წლის შეყვარებულს სამი დღის განმავლობაში გატაცებული ჰყავდა. გოგონას ინფორმაციით, მას ყოველ ღამე შეყვარებული მანქანაში აუპატიურებდა.