თბილისის "დინამოს" ლეგენდარული ფეხბურთელის, ვიტალი დარასელიას ვაჟს 2.5 წლით თავისუფლების აღკვეთა შეეფარდა. მას ბრალად ბინის ქურდობა ედება.

"მასკოვსკი კამსამოლეცის" ინფორმაციით, 35 წლის ვიტალი დარასელია-უმცროსი გასული წლის 23 მაისს ბაზრობაზე დააკავეს თანამემამულესთან ერთად, როდესაც მოპარულ ნივთებს (ნოუთბუქი, ფოტოკამერა) ყიდდნენ.

დარასელიას თანამზრახველი ყველაფერს თავის თავზე იღებდა, თუმცა სასამართლომ მას არ დაუჯერა.

ვიტალი დარასელია უმცროსმა, რომელიც სხვადასხვა დროს თბილისის "დინამოს", კიევის ცესკა-ს, ვლადიკავკაზის "ალანიასა" და კიშინიოვის "დაჩიას" ღირსებას იცავდა, ფეხბურთელის კარიერა 2009 წელს დაასრულა. ვიტალი დარასელია-უმცროსი საქართველოს ნაკრების ღირსებას 2002-2005 წლებში იცავდა (10 მატჩი).