სამართალდამცველებმა შარტავას ქუჩაზე, #35-ში გაუწონასწორებელი ფსიქიკის მქონე ადამიანი, რომელიც ადგილობრივებს საფრთხეს უქმნიდა, დააკავეს. აღნიშნული ინფორმაცია „ნიუპოსტს“ შინაგანს საქმეთა სამინისტროს პრესსამსახურში დაუდასტურეს.

მათივე ცნობით, მოქალაქე სისხლის სამართლის კოდექსის 239 მუხლით დააკავეს, რაც ხულიგნობას გულისხმობს.

როგორც შსს-ში აცხადებენ, ინციდენტის შედეგად არავინ დაზარალებულა.

როგორც „ნიუპოსტთან" საუბრისას თვითმხილველები აცხადებდნენ, პიროვნება გარშემომყოფთ, დანით ხელში დასდევდა. მათივე ინფორმაციით, მამაკაცი ფხიზელ მდგომარეობაში იყო.

„ეზოში გამოვარდა დანით და ხალხს დევნა დაუწყო. შემდეგ ავტომობილებს საბურავები დაუხეთქა. ერთ-ერთ მოხუცს დანით გაეკიდა, მაგრამ მეზობლებმა საშუალება არ მივეცით, რომ მისთვის რაიმე დაზიანება მიეყენებინა. ეს პიროვნება და მისი ცოლი ნაქირავებში ცხოვრობენ. როგორც მისი მეუღლე ამბობს, ეს პირველი შემთხვევაა და მსგავსი საქციელი არასდროს ჩაუდენია. გამოვიძახეთ პატრული, თუმცა მისი წაყვანა არ უნდათ, არადა საშიშია ეს პიროვნება“, - განაცხადა „ნიუპოსტთან“ საუბარში ადგილობრივმა.