ნანუაშვილმა პროკურატურას პატიმრების ცემის ფაქტზე გამოძიების მოთხოვნით მიმართა

სამართალი - 16:45, 08 May, 2014

1559

საქართველოს სახალხო დამცველის რწმუნებულები 2 მაისს საქართველოს შინაგან საქმეთა სამინისტროს ადამიანის უფლებათა დაცვისა და მონიტორინგის მთავარი სამმართველოს თბილისისა და მცხეთა-მთიანეთის დროებითი მოთავსების იზოლატორში იმყოფებოდნენ, სადაც ბრალდებულ გ.წ.-სა და გ.ა.-ს შეხვდნენ და ესაუბრნენ.
ბრალდებულების განმარტებით, ისინი 1 მაისს საქართველოს შინაგან საქმეთა სამინისტროს თანამშრომლებმა დააკავეს. დაკავებისას და დაკავების შემდგომ მათ მიმართ განხორციელდა არასათანადო მოპყრობა, რაც გამოიხატა არაერთგზის ფიზიკურ ძალადობაში. ბრალდებულთა ახსნა-განმარტებების მიხედვით, დაკავების შემდეგ ისინი გადაიყვანეს გლდანი-ნაძალადევის შს სამმართველოს VIII განყოფილებაში, სადაც მათ მიმართ ფიზიკური და სიტყვიერი შეურაცხყოფა განახორციელეს გლდანი-ნაძალადევის სამმართველოს უფროსმა და სამმართველოს სხვა თანამშრომლებმა.
სახალხო დამცველის რწმუნებულებთან შეხვედრისას, ბრალდებულ გ.წ.-ს აღენიშნებოდა მრავლობითი დაზიანებები სახის, თავისა და კისრის არეში, ხოლო გ.ა.-ს აღენიშნებოდა სისხლნაჟღენთი მარჯვენა თვალზე, მრავლობითი დაზიანებები ზურგის, მკლავების, მაჯების, მუხლების, კისრისა და მუცლის მიდამოებში.
„საქართველოს სახალხო დამცველის შესახებ“ საქართველოს ორგანული კანონის 21-ე მუხლის „გ“ ქვეპუნქტის შესაბამისად, საქართველოს სახალხო დამცველმა მოქალაქე გ.წ.-სა და მოქალაქე გ.ა-ს მიმართ სამართალდამცავი პირების მხრიდან განხორციელებულ შესაძლო დანაშაულებრივ ქმედებებთან დაკავშირებით გამოძიების დაწყების მოთხოვნით მიმართა საქართველოს მთავარ პროკურორს.
საქართველოს სახალხო დამცველი კიდევ ერთხელ აფიქსირებს თავის პოზიციას იმასთან დაკავშირებით, რომ ნებისმიერი ინფორმაცია, რომელიც სამართალდამცავი პირების მიერ დანაშაულის შესაძლო ჩადენას ეხება, საჭიროებს განსაკუთრებულ ყურადღებას, სწრაფ და ეფექტიან რეაგირებას.