რუსეთი უკრაინას გაზის გადასახადს შეუმცირებს იმ შემთხვევაში, თუ უკრაინა არსებულ დავალიანებას გადაიხდის, ევროკავშირი კი „სამხრეთის ნაკადის“ მშენებლობას არ შეაჩერებს. ამის შესახებ რუსული მედია იუწყება.

რუსეთი მსგავს ქმედებას იმ შემთხვევაში განახორციელებს, თუ კიევი ოფიციალურ თხოვნას გაავრცელებს ბუნებრივი აირის გადასახადის შემცირებასთან დაკავშირებით. ოფიციალური მოსკოვის პრინციპული მოთხოვნა დავალიანების დაფარვაა. ამასთანავე რუსეთის ფედერაცია ევროკავშირთან და უკრაინასთან მოლაპარაკებების შემდგომ ეტაპზე, კატეგორიულად მოითხოვს „სამხრეთ ნაკადის“ მშენებლობის გაგრძელებასა და პროექტის დასრულებას.

მიმდინარე წლის 2 მაისს ვარშავაში, რუსეთის ფედერაციას, ევროკავშირისა და უკრაინის წარმომადგენლებს შორის გამართული მოლაპარაკების შემდეგ, რუსეთის პოზიციები უკრაინასთან მიმართებით არ შეცვლილა.

შეგახსენებთ, რომ რუსეთმა მიმდინარე წლის აპრილში უკრაინისთვის არსებული ყოველგვარი შეღავათები ბუნებრივი აირის შესყიდვასთან დაკავშირებით გააუქმა, გაზის ღირებულება კი 485,5 ამერიკულ დოლარამდე გაიზარდა, რაც თითქმის ორჯერ უფრო ძვირია, ვიდრე კონფლიქტის გაღვივებამდე იყო.