ცხინვალის დე-ფაქტო ხელისუფლებამ, ხაშურის და ქარელის რაიონიდან გატაცებული ქართველები ჯარიმის გადახდის სანაცვლოდ გაათავისუფლა.

ორი მათგანი სოფელ კლდისწყაროს მკვიდრია, ერთი კი - სოფელ ცერონისის. 34 წლის გიორგი ხარაიშვილი, 42 წლის ბესიკ გელაშვილი და 70 წლის მერაბ კაპანაძე ოსურმა მხარემ ქართველ სამართალდამცავებს დღეს გადმოსცეს.

ისინი ამ წუთებში შიდა ქართლის სამხარეო პოლიციაში დაკითხვაზე იმყოფებიან. 70 წლის მერაბ კაპანაძე ოკუპანტებმა სოფელ ცერონისის ტერიტორიიდან 10 დღის წინ გაიტაცეს, რაც შეეხება ხარაიშვილს და გელაშვილს მათი დაკავება 25 აპრილს იმ დროს მოხდა, როდესაც ისინი სოფლის განაპირას ჯონჯოლს კრეფდნენ.

გელაშვილმა, ხარაიშვილმა და კაპანაძემ გათავისუფლების სანაცვლოდ მარიონეტულ რეჟიმს დაწესებული ჯარიმა 2000 რუსული რუბლი გადაუხადეს. ისინი ცხინვალის დე-ფაქტო სასამართლომ ე.წ. საზღვრის უკანონოდ გადაკვეთის ბრალდებით გაასამართლა.

გიორგი ახალკაცი "ნიუპოსტი" გორი