გაეროში უკრაინის მუდმივმა წარმომადგენელმა, იური სერგეევმა განაცხადა, რომ რუსეთის მიერ უკრაქინის აღმოსავლეთში „აფხაზური სცენარის“ რეალიზების ალბათობა დიდია.

„სამწუხაროდ, უნდა ვთქვათ, რომ ეს ძალიან რეალისტური სცენარია. არსებობს ინფორმაცია, რომ რუსული სამხედრო სატრანპორტო საშუალებები უკრაინულ და რუსულ ენებზე წარწერებით „სამშვიდობო მისია“, უკვე გადაადგილდებიან უკრაინის საზღვართან. ზუსტად ასე მოხდა აფხაზეთში“, - თქვა უკრაინელმა დიპლომატმა.

გაეროს უსაფრთხოების საბჭოს სხდომაზე გამოსვლისას, ნიუ-იორკში, მან ასევე აღნიშნა, რომ რუსეთის ერთ-ერთ მიზანს წარმოადგენს 25 მაისს დაგეგმილი საპრეზიდენტო არჩევნების ჩაშლა.

მოსკოვმა არაერთხელ განაცხადა, რომ არ აპირებს მეზობელი ქვეყნის ტერირტორიაზე შეჭრას.

მოამზადა ლევან ებრალიძემ.