საოკუპაციო რეჟიმმა ხაშურის რაიონიდან გატაცებული ქართველებიდან ერთ-ერთი შესაძლოა ჯარიმის გადახდის სანაცვლოდაც არ გაათავისუფლოს.

ამის შესახებ „ნიუპოსტს“ სოფელ კლდისწყაროში განუცხადეს. ადგილობრივები აღნიშნულს იმის საფუძველზე ამბობენ, რომ გატაცებული 34 წლის გიორგი ხარაიშვილი ცხინვალის დე-ფაქტო ხელისუფლებამ ე.წ. საზღვრის გადაკვეთის ბრალდებით გასულ წელსაც გაასამართლა.

ადგილობრივებისთვის ცნობილია, რომ მარიონეტული რეჟიმი საქართველოს მოქალაქეებს განმეორებით პირობითი საზღვრის დარღვევის შემთხვევაში ჯარიმის გადახდის შედეგადაც არ ათავისუფლებს. „ჩვენ ასე გავიგეთ, რომ ახლა გატაცებულის ოჯახებმა ორი ათასი რუბლებიც უნდა გადაიხადონ და თან ორი თვე უნდა დატოვონ ციხეშიოა, შეიძლება გიორგი ხარაიშვილი კიდევ დიდხანს დატოვონ ეგ შარშანაც დაიჭირეს და 13 დღე ჰყავდათ ცხინვალის ციხეში, მაგ ბიჭს ჯანმრთელობასთან დაკავშირებული პრობლემები აქვს ავად არის“ აცხადებს ადგილობრივი მკვიდრი მევლუდ გელაშვილი.

34 წლის გიორგი ხარაიშვილის და 42 წლის ბესიკ გელაშვილი რუსმა ძალოვნებმა სამი დღის წინ სოფლის განაპირას ქართული მხარის კონტროლირებად ტერიტორიაზე დააკავეს, ისინი ჯონჯოლის მოსაკრებად იყვნენ წასულები.