ელენე ხოშტარია ანტიდისკრიმინაციული კანონპროექტის გადადებას ანტიევროპულ ნაბიჯად მიიჩნევს

პოზიცია - 18:26, 28 Apr, 2014

3782

ექსპერტი ელენე ხოშტარია „ნიუპოსტთან“ საუბარში ანტიდისკრიმინაციულ კანონპროექტს, მის მიღება-არ მიღებას და საქართველოს პატრიარქის პარლამენტისადმი მოწოდებას აფასებს.

ხოშტარია მიიჩნევს, რომ თუკი პარლამენტი არ განიხილავს ამ კანონპროექტს, ეს იქნება ანტიევროპული და ანტისახელმწიფოებრივი ნაბიჯი.

ილია მეორის დღევანდელი განცხადებიდან გაირკვა, რომ საპატრიარქო საკანონმდებლო ორგანოს მოუწოდებს გადადოს აღნიშნული კანონპროექტის მოცემული სახით მიღება, უზრუნველყოს ეკლესიისა და ფართო საზოგადოების ჩართულობა მის განხილვაში, რათა მიღწეულ იქნას შეთანხმება და ევროპისაკენ ქვეყნის სწრაფვაზე ნაჩქარევმა ქმედებამ უარყოფითად არ იმოქმედოს.

როგორც ექსპერტი განმარტავს, სახელმწიფო კანონების მიღება ან შეჩერება, საპატრიარქოს პრეროგატივა არ არის.

„ბუნებრივია, კანონის მიღება არ არის საპატრიარქოს პრეროგატივა. მან არ უნდა გვიკარნახოს კანონების შეჩერებისკენ. ანტიდისკრიმინაციული კანონის მიღება არის გრძელპერსპექტივიანი პოლიტიკის ნაწილი ჩვენი ევროპული ინტეგრაციის და საუბარი რაიმეს შეჩერებაზე აბსოლუტურად გაუგებარია“, - აღნიშნა ექსპერტმა „ნიუპოსტთან“ საუბრისას. ხოშტარიას განმარტებით, ანტიდისკრიმინაციული კანონის გარშემო ატეხილი აჟიოტაჟი, თითქოს ეს ქართულ იდენტობას აკნინებს, ძალიან საშიში პროცესია.

„პირველ რიგში ანტიდისკრიმინაციული კანონი ნიშნავს ძალადობაზე და ადამიანების დისკრიმინაციაზე უარის თქმას. ევროკავშირთან თუ ევროკავშირის გარეშე, ეს ჩვენი ფასეულობა ისედაც უნდა იყოს, თუ გვინდა, რომ თავისუფალ და დემოკრატიულ სახელმწიფოში ვიცხოვროთ. ეს არის პირდაპირ მიბმული ჩვენს ევროპულ ინტეგრაციასთან, თუ გვინდა, რომ დაგვიცვან და ჩვენს კეთილდღეობაზე იზრუნონ ევროპულმა სახელმწიფოებმა, მათ უნდა იცოდნენ, რომ ჩვენ ვართ ისეთივე ფასეულობების სახელმწიფო, ისეთივე ერთგული დემოკრატიის და თავისუფლების როგორც ისინი არიან. შესაბამისად, თუ ჩვენ ამაზე უარს ვიტყვით, ეს ნიშნავს პრაქტიკულად ევროპულ ინტეგრაციაზე უარის თქმას. ამიტომ, დღეს მთავრობის პოზიცია და არამარტო მთავრობის, საზოგადოების პოზიცია ამ კანონთან მიმართებაში იქნება ტესტი, თუ რამდენად სერიოზულად ვართ ჩვენ განწყობილები ევროპულ ინტეგრაციაზე“, - განუცხადა "ნიუპოსტს" ელენე ხოშტარიამ.
მისივე თქმით, აღნიშნული კანონი პირდაპირ მიბმულია ვიზალიბერალიზაციასთან, ანუ ვიზების გაუქმებასთან ევროკავშირში.

„თუ ჩვენ გვინდა, რომ ვიაროთ უვიზოდ მთელი რიგი ღონისძიებებია გასატარებელი. მათ შორის არის ანტიდისკრიმინაციული კანონი, რომელიც მეტყველებს იმაზე, რომ შენ ხარ ნორმალური სახელმწიფო. ეს ორი პირდაპირ არის დაკავშირებული. თუ ეს პროცესი ნამდვილად შეჩერდება, თუ ჩვენ ამ კანონს გადავავადებთ, ან არ მივიღებთ, ეს იქნება ჩვენი ევროპული ინტეგრაციის მზაობაზე დამოკიდებული. ამიტომ, აქ უნდა იყოს მთავრობის და საზოგადოების მკაფიო, ცალსახა პოზიცია, რომ ეს არის ქართული საზოგადოების გადაწყვეტილება, რომ ჩვენ ასეთი სახელმწიფო ვართ და არა მოძალადე“, - განმარტა ექსპერტმა „ნიუპოსტთან“ საუბარში და დასძინა, რომ პარლამენტის მხრიდან არანაირ გადადებაზე არ უნდა იყოს საუბარი.

ელენე ხოშტარიას შეფასებითვე, თუკი პარლამენტი არ განიხილავს ამ კანონპროექტს, "ეს ნიშნავს, რომ ჩვენ არა ვართ თავისუფალი სახელმწიფო, სადაც ადამიანებს არ ურტყამენ იმის მიხედვით, თუ რას და როგორ ფიქრობენ ისინი“.

ნინა გოლოშვილი