კლუბ "სენატის" დიჯეის კრისტიან მაკნალტის თვითმკვლელობის შესახებ ბევრი დეტალია გარკვეული, თუმცა დადასტურებულად არავინ იცის, რატომ დაასრულა ირლანდიის მოქალაქემ სიცოცხლე სუიციდით.

დიჯეის თვითმკვლელობის შესახებ დეტალებს გაზეთი „პრაიმტაიმი“ ასაჯაროვებს.

მათი ინფორმაციით, დიჯეიმ თვითმკვლელობამდე ნოტარიუსის დახმარებით მთელი თავისი ქონება ყოფილ შეყვარებულს, მოდელს ელენე წიკლაურს დაუტოვა. სწორედ ელენემ უნდა აიღოს მეურვეობა კრისტიანის 15 წლის ქალიშვილზე.

როგორც საგაზეთო ინტერვიუში დიჯეის მეგობრები აცხადებენ, ელენე მზად არის მეურვეობას დასთანხმდეს. თუმცა, ქონებასთან დაკავშირებით კონკრეტულ პასუხს არ ამბობს.

ელენე წიკლაური, კრისტიან მაკნალტის შეყვარებული:

- არ ვიცი, არაფერი არ არის გადაწყვეტილი და არაფერი არ არის მანდ ნათქვამი, რომ მე დამიტოვა თუ ვის დაუტოვა. ყველაფერი გაირკვევა, როგორც წესია, და ამას გაარკვევენ გამომძიებლები.

ქონებასთან დაკავშირებით კითხვები მეგობრებსაც აქვთ. პაატა დათუაშვილის განცხადებით ნოტარიუსით დამოწმებულ ფურცელს იურიდიული ძალა არ აქვს, რადგან დოკუმენტებში არ ფიგურირებს ექიმის და ფსიქოლოგის დასკვნა.

პაატა დათუაშვილი, კრისტიანის მეგობარი:

- კრისტიანის წერილში ნამდვილად იყო ელენე მოხსენიებული. წერილში კრისტიანს ეწერა, რომ ქონება მინდა განკარგოს ელენემო. ნოტარიუსის წერილშიც იგივეს წერდა. მე არ ვიცი, რამდენად აქვს ნოტარიულად დამოწმებულ დოკუმენტს იურიდიული ძალა, რადგან თქვენ კარგად იცით, რომ, როდესაც მსგავსი წერილი დგება, ადამიანი ფხიზელ მდგომარეობაში უნდა იმყოფებოდეს, იქვე უნდა იჯდეს ექიმი, რომელსაც შემოწმებული ეყოლება ეს ადამიანი და ხელი ექნება მოწერილი, რომ იმ მომენტში ეს ადამიანი არ იყო ან წამლის, ან სასმელის ზემოქმედების ქვეშ. ეს ჩვეულებრივი წესია. როგორც ვიცი, ისე დაწერილ წერილს და ვიღაცის მიერ ბეჭედდარტყმულ ქაღალდს იურიდიულად ძალა არ აქვს.