სამართალდამცავთა მოთხოვნისადმი დაუმორჩილებლობის ან მათ მიმართ სხვა კანონსაწინააღმდეგო ქმედების ჩადენის შემთხვევაში, ადმინისტრაციული ჯარიმის ქვედა ზღვარი 400 ლარით განისაზღვრება, ხოლო ფულადი სანქციის ზედა ზღვარი - 2 000-ლარი.

"ადმინისტრაციულ სამართალდარღვევათა კოდექსის" შესაბამის – 173-ე მუხლში გასულ წელს განხორციელდა ცვლილებები, რომლის თანახმად სამართალდამცავთა მოთხოვნისადმი დაუმორჩილებლობის შემთხვევებზე ფულად სანქციად დაწესდა ჯარიმა - 2 000-ლარამდე ოდენობით.

კოდექსში ჩაიწერა, რომ სამსახურებრივი მოვალეობის შესრულების დროს სამართალდამცავი ორგანოს თანამშრომლის, სამხედრო მოსამსახურის, სახელმწიფო დაცვის სპეციალური სამსახურის თანამშრომლის ან აღსრულების პოლიციელის კანონიერი განკარგულებისადმი ან მოთხოვნისადმი დაუმორჩილებლობა, ან ამ პირის სიტყვიერი შეურაცხყოფა, ან მის მიმართ სხვა შეურაცხმყოფელი ქმედების განხორციელება (გარდა ფიზიკური შეურაცხყოფისა), გამოიწვევს დაჯარიმებას 2000 ლარამდე ან ადმინისტრაციულ პატიმრობას 15 დღემდე ვადით.

შს სამინისტროს ინიციატივით "ადმინისტრაციულ სამართალდარღვევათა კოდექსში" შემავალი ცვლილებების თანახმად ადმინისტრაციული სახდელის ზომა იცვლება და საჯარიმო თანხის ქვედა ზღვარი 400 ლარით განისაზღვრება, ხოლო ზედა ზღვარი – 2 000 ლარამდე უცვლელი დარჩება.

"ადმინისტრაციულ სამართალდარღვევათა კოდექსში" დაგეგმილი ცვლილებები პარლამენტში ინიცირებულია. მის განხილვას მთავრობა დაჩქარებული წესით ითხოვს.