საქალაქო სასამართლო ოქრუაშვილთან დაკავშირებით განცხადებას ავრცელებს

სამართალი - 20:46, 25 Apr, 2014

2089

თბილისის საქალაქო სასამართლო ოქრუაშვილთან დაკავშირებით მიღებულ გადაწყვეტილებასთან დაკავშირებით განმარტებას აკეთებს. "ნიუპოსტი" განცხადებას უცვლელად გთავაზობთ:

"მხარეთა შორის დავის საგანს საქართველოს ცენტრალური საარჩევნო კომისიის 2014 წლის 22 აპრილის განკარგულების ბათილად ცნობა და გორის 32-ე საოლქო საარჩევნო კომისიის თავმჯდომარის იმ განკარგულების ძალაში დატოვება წარმოადგენდა, რომლითაც ირაკლი ოქრუაშვილი დარეგისტრირდა გორის მერობის კანდიდატად.

მოსარჩელის განცხადებით, გორის #32 საოლქო საარჩევნო კომისიის თავმჯდომარის 2014 წლის 19 აპრილის განკარგულებით, "ირაკლი ოქრუაშვილი- ქართული პარტიის" წარმომადგენელი ირაკლი ოქრუაშვილი დარეგისტრირდა გორის მერობის კანდიდატად. აღნიშნული განკარგულება პ/მ "სამართლიანი საქართველოსათვის" და პ/გ "სახალხო პარტიის" მიერ ცენტრალურ საარჩევნო კომისიაში იმ საფუძვლით გასაჩივრდა, რომ ირაკლი ოქრუაშვილი მუდმივად არ ცხოვრობდა საქართველოში ბოლო 2 წლის განმავლობაში, რაც კანდიდატისთვის სავალდებულო პირობას წარმოადგენს. ამავე კომისიის 22 აპრილის განკარგულებით გაუქმდა ი. ოქრუაშვილის რეგისტრაცია თვითმმართველობის არჩევნებში მერობის კანდიდატად მონაწილეობის თაობაზე. მოსარჩელის განმარტებით აღნიშნული გადაწყვეტილება უსაფუძვლოა, ვინაიდან 2006 წლიდან დღემდე ი. ოქრუაშვილი რეგისტრირებულია ქალაქ თბილისში, რაც თავისთავად გულისხმობს, რომ მისი საცხოვრებელი ადგილია ქ.თბილისი, შესაბამისად ცესკო-ს განკარგულება ბათილად უნდა იქნეს ცნობილი.

თავის მხრივ, წარმოდგენილი შესაგებლით, მოპასუხე საქართველოს ცენტრალური საარჩევნო კომისია, არ დაეთანხმა სარჩელს და განმარტა, რომ სადავო ადმინისტრაციულ-სამართლებრივი აქტი გამოცემულია კანონის მოთხოვნათა დაცვით და არ არსებობს მისი ბათილად ცნობის სამართლებრივი და ფაქტობრივი საფუძვლები. მოპასუხე მხარემ მიუთითა, რომ ი. ოქრუაშვილს უარი ეთქვა კანდიდატად დარეგისტრირებაზე საქართველოს ორგანული კანონის "საქართველოს საარჩევნო კოდექსის" იმ მოთხოვნის დარღვევის გამო, რომელიც მერობის კანდიდატისთვის საქართველოში ბოლო 2 წლის მანძილზე მუდმივად ცხოვრების აუცილებლობას აწესებს. სასამართლომ შეაფასა საქმეში წარმოდგენილი მტკიცებულებები, მხარეთა ახსნა-განმარტებები და მიიჩნია, რომ სარჩელი არ უნდა დაკმაყოფილდეს. კერძოდ, სასამართლომ მიიჩნია, რომ საარჩევნო მიზნებისათვის საცხოვრებელი ადგილის დეფინიციას საქართველოს ორგანული კანონი "საქართველოს საარჩევნო კოდექსი" არ განსაზღვრავს. თუმცა, იგივე კოდექსი მიუთითებს, რომ მერობის კანდიდატი არჩევნების დანიშვნის დღემდე ბოლო 2 წლის განმავლობაში უნდა ცხოვრობდეს საქართველოში. სასამართლოს მოსაზრებით, კანონმდებლის ნებაა მერად არ იქნეს არჩეული ისეთი პიროვნება, რომელიც არჩევნების დანიშვნის დღემდე ბოლო 2 წლის განმავლობაში უშუალოდ არ იმყოფებოდა და ფაქტობრივად არ ცხოვრობდა ქვეყანაში. სასამართლო განხილვისას დადგინდა, რომ ი. ოქრუაშვილი 2012 წლის აპრილიდან 2012 წლის ნოემბრამდე არ იმყოფებოდა საქართველოში, შესაბამისად, სასამართლომ მიიჩნია, რომ დაირღვა საარჩევნო კანონმდებლობის მოთხოვნა კანდიდატის ბოლო 2 წლის მანძილზე ქვეყანაში მუდმივად ცხოვრებასთან დაკავშირებით.
აღნიშნული გადაწყვეტილება შეიძლება გასაჩივრდეს თბილისის სააპელაციო სასამართლოში მისი გამოტანიდან 1 კალენდარული დღის განმავლობაში, თბილისის საქალაქო სასამართლოს მეშვეობით", - ნათქვამია სასამართლოს მიერ გავრცელებულ განცხადებაში.