აჭარის ავტონომიური რესპუბლიკის ყოფილი მეთაურის ასლან აბაშიძის დაცვის ხელმძღვანელი დავით ხალვაში დააკავეს. ინფორაციას "ბათუმელები" ავრცელებს. წყაროს ინფორმაციით, ხალვაში, იგივე "ქელფეთა" ქართველმა სამართალდამცავებმა სარფში 22 აპრილს დააკავეს.

დავით ხალვაშის მიმართ 2004 წელს სისხლის სამართლის კოდექსის არაერთი მუხლით აღიძრა საქმე.

დავით ხალვაშს ბრალად ედება 2004 წელს აქციების დარბევის ორგანიზება-მონაწილეობა (მათ შორის იმ აქციის დარბევა, რასაც ევროსაბჭოს გენერალური მდივნის - ვალტერ შვიმერის ბათუმში ვიზიტი დაემთხვა).

დავით ხალვაში ასლან აბაშიძის ხელისუფლების კიდევ ერთ ჩინოვნიკთან - დავით ბაკურიძესთან ერთად ბრალადებულია ბიზნესმენ თამაზ გელაძის გატაცებაში, მისთვის 800 ათასი დოლარის ღირებულების ქონებისა და ასევე ფულის გამოძალვაში. მას სახელმწიფო ასევე ედავება უკანონო შეიარაღებული ფორმირების შექმნას. დავით ხალვაში ფიგურირებს იმ სისხლის სამართლის საქმეშიც, რომელიც ასლან აბაშიძის წინააღმდეგ არის აღძრული.

დავით ხალვაში 2004 წელს „აჭარის ვარდების რევოლუციის“ შემდეგ, ასლან აბაშიძესთან ერთად მოსკოვში წავიდა.