უკრაინის პრეზიდენტის მოვალეობის შემსრულებლის ალექსანდრე ტურჩინოვის განცხადებით, ხელისუფლება გააგრძელებს შესაბამისი ზომების მიღებას იმისათვის, რომ მშვიდობიანი მოსახლეობა ტერორისტებისგან დაიცვან.

ტურჩინოვის განცხადებას რუსული მედია ავრცელებს.

მისივე თქმით, აუცილებელია, რუსეთმა შეწყვიტოს უკრაინის შიდა საქმეებში ჩარევა და გაიყვანოს საკუთარი ჯარები ქვეყნის აღმოსავლეთ საზღვრიდან. ტურჩინოვმა რუსეთი ტერორისტების მხარდაჭერაში დაადანაშაულა, რომლებიც ქვეყნის აღმოსავლეთ რეგიონებში მოქმედებენ.

რუსული მედიის ცნობითვე, სლავიანსკში ამ დროისთვის 2500 ამბოხებულია მობილიზებული, რომლებიც ქალაქის დაცვას აპირებენ. ამასთან, ქვეყნის თავდაცვის სამინისტრო აცხადებს, რომ უკრაინელი სამხედროები არასდროს გამოიყენებენ იარაღს მშვიდობიანი მოსახლეობის წინააღმდეგ.